Almaty polıtsııasy adam qaza tapqan jol apaty týraly túsinikteme berdi
ALMATY. QazAqparat - Almaty ІІD resmı ókili Saltanat Ázirbek búgin tańerteń bolǵan jol apaty týraly túsinikteme berdi, dep habarlaıdy QazAqparat tilshisi.
Onyń aıtýynsha, №54 avtobýs pen jeńil kólik soǵylǵany týraly aqparat tańerteń túsken. Jol apatynan 7 jolaýshy men avtobýs júrgizýshisi japa shegip, Toıota kóliginiń júrgizýshisi qaza tapqan edi.
«Bul derek QR QK 345-baby, 3-bólimimen sotqa deıingi biryńǵaı tergeý tizilimine tirkeldi. Bul derek boıynsha qajetti saraptamalar taǵaıyndalady. Adam densaýlyǵyna keltirilgen zaqym deńgeıin anyqtaý úshin sot medıtsınalyq saraptama jasalady. Júrgizýshilerdiń qaısysy jol erejesin buzǵany anyqtalatyn bolady», - dedi S.Ázirbek.
ІІD resmı ókili jol apatyna kóktaıǵaq sebepshi bolǵanyn rastamady.
«Kózben kórip anyqtaı almaımyz. Onyń sebebin taǵaıyndalǵan saraptamalar anyqtaıdy», - dedi ol.
Almaty oblystyq Densaýlyq saqtaý basqarmasynyń habarlaýynsha, medıtsınalyq qyzmetke júgingen 8 adam qazir ambýlatorııalyq emdeýge úılerine jiberilgen.
Oqıǵa kýágerleriniń aıtýynsha, atalǵan qıylysta lıýkten sý tolassyz aǵyp, tańǵa jýyq kóktaıǵaqqa aınalǵan. Tańerteńnen beri bul jerde 4 jol apaty tirkeldi.
