Almaty polıtsııasy 80 myńǵa jýyq úıdi tekserdi
ALMATY. QazAqparat– Almaty polıtseıleri «Ýchaske» jedel-aldyn alý is-sharasy aıasynda 80 myńǵa jýyq úıdi aralap, 6640 adamdy ákimshilik jaýapkershilikke tartty, dep habarlaıdy QazAqparat tilshisi.
Qalalyq Polıtsııa departamentiniń baspasóz qyzmeti málim etkendeı, Qazaqstan Respýblıkasy Іshki ister mınıstrliginiń tapsyrmalaryn oryndaý, sondaı-aq quqyq buzýshylyqtardyń aldyn alý, anyqtaý jáne jolyn kesý maqsatynda aǵymdaǵy jyldyń 7 qyrkúıeginen 1 jeltoqsanyna deıin Almaty qalasynyń aýmaǵynda «Ýchaske» jedel-aldyn alý is-sharasy ótkizilýde.
«Іs-sharanyń basty maqsaty – ákimshilik ýchaskedegi páterlerdi jáne úılerdi aralaý, turǵyndarmen baılanys ornatý, ishki ister organdarynyń profılaktıkalyq esepterinde turǵan adamdardy, azamattyq qarýdyń ıelerin turǵylyqty jeri boıynsha, sondaı-aq, bazarlar men basqa da saýda oryndaryn tekserý», – dedi Almaty qalasynyń PD Jergilikti polıtsııa qyzmeti basqarmasynyń bastyǵy Manap Sattarov.
Ýchaskelik polıtsııa ınspektorlary 77 114 turǵyn úıdi aralady.
«Іs-shara barysynda salyq organdarynda tirkeýsiz jalǵa berilgen 1 358 páter anyqtaldy. Aqparat shara qabyldaý úshin aýdandardyń salyq basqarmalaryna jiberildi. Jeke basyn anyqtaý maqsatynda 73 sheteldik azamat qabyldaý bólimine, al 18 kámeletke tolmaǵan beıimdeý ortalyǵyna ornalastyryldy. Esepte turǵan 1 871 adam, sondaı-aq 6 390 atys qarýynyń ıeleri tekserildi, nátıjesinde qarýdy saqtaý erejelerin buzǵany úshin 128 qarý tárkilendi. 6 640 adam túrli quqyq buzýshylyqtar jasaǵany úshin ákimshilik jaýapkershilikke tartyldy, – dep qorytyndylady polıtsııa polkovnıgi Sattarov.
