Almaty polıtsııasy 6 jasar qyzdyń jumbaq ólimin tekserip jatyr
ALMATY. QazAqparat - Almaty polıtsııasy 6 jasar almatylyq Elızaveta Pylaevanyń jumbaq ólimin tekserip jatyr, dep habarlaıdy QazAqparat tilshisi.
Qyzdyń ákesi Aleksandr Pylaevtyń aıtýynsha, balany 9 mamyrda anasy alyp ketken. 12 mamyrda oǵan burynǵy jubaıy habarlasyp balanyń aýrýhanada aýyr halde jatqanyn habarlaǵan.
«Qyzym menimen turatyn. 9 mamyrda ony anasy, meniń burynǵy áıelim alyp ketti.12 mamyrda ol maǵan keshke qońyraý shalyp, qyzymnyń aýrýhananyń jansaqtaý bólimine túskenin aıtty. Ol «Lıza eskertkish músinnen qulap qaldy», dedi. Dereý aýrýhanaǵa keldim. Dárigerlerdiń aıtýynsha, qyzym aýrýhanaǵa kelgende óli túsken. Balamnyń omyrtqasy synyp ketken. Denesi jaraqat alǵan. Biraq ústinde bir tamshy qan joq. Tań qalarlyq bolyp kórindi», - dedi ákesi Aleksandr Pylaev.
Endi áke jalǵyz balasynyń qalaısha kóz jumǵanyn bilgisi keledi. Polıtsııa osy oqıǵa boıynsha «adam ólimi» degen bappen qylmystyq is qozǵady.
«Atalǵan derek QR QK-niń 99-baby boıynsha sotqa deıingi tergeý isi tizilimine tirkeldi. Sot-medıtsınalyq saraptama taǵaıyndaldy. Osyǵan oraı protsessýaldyq sheshim qabyldanady»,- dedi qalalyq Polıtsııa departamentinen.
