Almaty polıtsııasy 4 jastaǵy balany kóligimen qaǵyp, tal túbine tastap ketkenderdi izdestirýde
ALMATY. QazAqparat - Almaty polıtsııasy tal túbinen es-tússiz jatqan jerinen tabylǵan 4-jastaǵy balanyń jaǵdaıyna qatysty túsinikteme berdi, dep habarlaıdy QazAqparat tilshisi.
Almaty qalalyq Іshki ister departamentiniń baspasóz qyzmetiniń habarlaýynsha, Shyǵys aınalma jolyna jaqyn aımaqta bolǵan derekke qatysty sotqa deıingi tergeý jumystary bastaldy.
Qazir bul ispen Medeý aýdandyq ІІB janyndaǵy polıtsııa bólimi aınalysyp jatyr.
«Keshendi jedel jáne tergeý sharalarynyń arqasynda júrgizýshiniń kim ekendigi, avtokólik markasy anyqtalady. Kúdikti tulǵa QR QK zańnamasyna oraı jaýapqa tartylady», - dedi baspasóz qyzmetinen.
Aıta ketý kerek, jantúrshigerlik oqıǵa keshe Almatydaǵy shyǵys aınalma jolyna jaqyn Brıanskaıa kóshesinde bolǵan. 4 jastaǵy balany kólik qaǵyp, qan josa bolǵan kúıde kórpege orap, tal túbine qaldyryp ketken.
Ata-anasy birneshe mınýt ótken soń ǵana balany júzdegen metr qashyqtan taýyp alǵan.
Al dárigerler búldirshinniń jaǵdaıyn óte aýyr dep baǵalap otyr. Qazir ul bala jansaqtaý bóliminde komada jatyr. Medıtsına mamandary balanyń ómirin arashalap qalýǵa baryn salýda.
Al Almaty qalasy Máslıhatynyń depýtaty, kásipker Qaırat Qudaıbergen balany qaqqandardy taýyp, jazalaýǵa baryn salýǵa ýáde berdi.
Bul týraly ol Feısbýktegi paraqshasynda jarııalady.
«Men ákesine habarlastym. Qazir ol balasynyń amandyǵyn oılap, jansaqtaý bólimin qaraýyldap júr. Men óz kezegimde barynsha materıaldyq kómek berýge ýáde berdim. Al dárigerler óz jumysyn 100 paıyzǵa atqaratynyna senemin. Men Máslıhat depýtaty retinde kináli adamdy taýyp, zań boıynsha jazalaýǵa barymdy salýǵa ýáde beremin», - dedi ol.
Depýtat jol apatynyń kýágerleri bolsa, ózine tikeleı jazýyn ótindi.
Foto: QazAqparat kollajy
