Almaty polıtsııasy 21 jastaǵy boıjetkendi qaǵyp ketken júrgizýshini ustady
ALMATY. QazAqparat - Almaty polıtsııasy jaıaý júrginshiler ótkelinen ótip bara jatqan qyzdy qaǵyp ketip, oqıǵa ornynan qashyp ketken júrgizýshini ustady. Bul týraly búgin Almaty qalalyq ІІD-niń baspasóz qyzmetinen habarlady.
Jol-kólik oqıǵasy keshe tańerteń Qaldaıaqov kóshesi boıynda bolǵan. Ońtústik baǵytta kele jatqan sheteldik kólik jaıaý júrginshiler jolaǵynan ótip bara jatqan boıjetkendi qaǵyp ketken.
«Júrgizýshi oqıǵa ornynan qashyp ketti. «Jedel járdem» mashınasyn jol-kólik oqıǵasyna kýá bolǵan basqa júrginshiler shaqyrǵan. Aýyr jaraqat alǵan boıjetken aýrýhanaǵa jetkizildi. Al Jergilikti polıtsııa qyzmeti izdestirý bóliminiń qyzmetkerleri jedel túrde keshendi sharalar júrgize otyryp, birneshe saǵattyń ishinde avtokólikti anyqtady. «Kıa» markaly avtokólikti 1995 jyly týǵan almatylyq azamat basqarǵan. Tún jarymǵa qaraı ol ustaldy. Oqıǵa ornynan iz jasyrǵan avtokóliktiń qalaı jáne qaı baǵytta júrip otyrǵany jańa tehnologııalar arqyly anyqtaldy», - dedi Almaty qalalyq ІІD Tergeý basqarmasynyń bastyǵy, polıtsııa podpolkovnıgi Rústem Ábdirahmanov.
Belgili bolǵanyndaı, adam qaǵyp ketken júrgizýshi úıine asyǵady. Onyń úıi Almaty oblysynyń Qarasaı aýdanyndaǵy eldi-mekenderdiń birinde ornalasqan. Al soqqydan búlingen avtokóligin úı mańyna jasyrady.
«Jigitti ustaǵan Jergilikti polıtsııa qyzmeti izdestirý bóliminiń qyzmetkerleri ony bizdiń bólimniń Jol-kólik oqıǵalaryn tergeý bólimine alyp keldi. Júrgizýshi kinásin moıyndady. Qazir QR QK 345-babynyń 2-tarmaǵy (boljam boıynsha, aýyr saldarǵa ákep soqqan jol-kólik oqıǵasy) jáne QR QK 345- baby (jol-kólik oqıǵasy ornyn tastap ketý) boıynsha sotqa deıingi tergeý amaldary júrgizilip jatyr.
Júrgizýshi ІІD-niń ýaqytsha tergeý abaqtysyna qamaldy. Taıaý ýaqytta sot tergeý kezeńine qatysty bultartpaý sharasyn bekitedi», - dedi podpolkovnık Ábdirahmanov.
