Almaty polıtsııasy 10 kúnge kúsheıtilgen qyzmetke aýystyrylady

ALMATY. QazAqparat - Almatyda 8-17 qarasha aralyǵynda jol-kólik qozǵalysy qatań baqylaýǵa alynady. Bul týraly qalalyq Polıtsııa departamentinen málim etti, dep habarlaıdy QazAqparat tilshisi.

«Qaýipsiz jol» jedel-aldyn alý is-sharasyna baılanysty Almatyda jol qozǵalysyn baqylaý kúsheıtiledi.

«Jedel-aldyn alý is-sharalary ótetin kúnderi polıtsııanyń jeke quramy kúsheıtilgen qyzmetke aýystyrylady. Bul rette narıadtardyń tyǵyzdyǵy artady. Sharanyń basty maqsaty – jol qozǵalysyna qatysýshylardyń joldaǵy tártibi men qaýipsizdigin qamtamasyz etý, jol qozǵalysy erejelerin buzý faktileriniń jolyn kesý, jol qozǵalysy erejeleriniń talaptaryn oryndamaıtyn júrgizýshilerdi anyqtaý», – dedi Almaty qalalyq Polıtsııa departamenti bastyǵynyń birinshi orynbasary Nurlan Almasbekov.

Sondaı-aq, is-shara barysynda polıtseıler áınekteri karańǵylanǵan, jalǵan tirkeý nómirleri bar kólikterdi paıdalaný, kólikti mas kúıde júrgizý, sıgnaldyq daýys zoraıtqysh qondyrǵylar men jypylyqtaıtyn maıaktardy ornatý, jyldamdyqty asyryp jiberý jáne basqa da jol júrý erejelerin buzý faktilerine nazar aýdarady.

«Qoǵamdyq kólik jáne taksı parkteriniń qyzmeti erekshe baqylaýda bolady. Osyǵan baılanysty qalalyq avtokásiporyndar ókilderimen jospardan tys kezdesýler josparlanǵan, onda jol qaýipsizdigin qamtamasyz etý boıynsha birqatar másele talqylanady», – dedi Polıtsııa departamenti bastyǵynyń birinshi orynbasary.