Almaty polıtseılerine sý jańa kólikter satyp alyndy

ALMATY. QazAqparat - Almaty qalasy Іshki ister departamentiniń avtoparki jańa tehnıkalarmen tolyqty, dep habarlaıdy QazAqparat tilshisi qalalyq ákimdikke silteme jasap.

Búgin Almaty ákimi Baýyrjan Baıbek qala bıýdjeti esebinen kommýnaldyq qyzmet jáne Іshki ister departamentine satyp alynǵan jańa tehnıkalardy qarap shyqty.

ІІD-niń bastyǵy Serik Kúdebaev kóshelerge patrýl jasaý úshin otandyq ári gazben júretin 200-den astam jeńil avtokólik birligi alynǵandyǵyn jetkizdi.

Bulardan ózge jeke quramdy tasymaldaıtyn eki avtobýs pen birneshe mıkroavtobýs, eki órt avtotsısternasy jáne 34 evakýator satyp alynǵan. Onyń ústine, 147 avtomashına vıdeotirkegishtermen jabdyqtalǵan. 

Aıta keterligi, Almatyda ótken jylmen salystyrǵanda bıyl quqyq qorǵaý organdaryn materıaldyq-tehnıkalyq jabdyqtaýǵa qarjy 2 ese kóp jumsalǵan. Eger 2016 jyly 706 mıllıon teńgege 118 jańa qyzmettik kólik alynsa, bıyl qala bıýdjeti esebinen 3,5 mlrd teńgege túrli modeldegi 280 kólik alynǵan.