Almaty polıtseılerine doq kórsetken «sheneýnik» jumyssyz bolyp shyqty
ALMATY. QazAqparat - Almaty polıtseıine qarsylyq tanytqan jalǵan sheneýnik jumyssyz bolyp shyqty. Qalalyq ákimdik tártip buzýshynyń kim ekeni týraly aqparat berdi, dep habarlaıdy QazAqparat tilshisi.
Qalalyq ákimdiktiń habarlaýynsha, «sheneýnik» Almaty ákimdigi Tabıǵı resýrstar jáne tabıǵat paıdalanýdy retteý basqarmasynyń memlekettik tapsyrys bóliminde jumys istep, naýryz aıynda óz erkimen qyzmetinen ketken.
«Qazirgi ýaqytta Almat Shaımerden Almaty ákimdiginiń memlekettik qyzmetshisi emes. Ol «Qazaqstan Respýblıkasynyń memlekettik qyzmet týraly» Zańynyń 1-baby, 1-tarmaqshasyna sáıkes, 2017 jyldyń 6 naýryzy kúni óz erkimen qyzmetinen bosatylǵan. A.Shaımerden Almaty qalasy ákimdigi Tabıǵı resýrstar jáne tabıǵat paıdalanýdy retteý basqarmasynyń memlekettik tapsyrys bólimine bas maman bolyp, 2012 jyldyń sáýir aıynda taǵaıyndalǵan. Onyń polıtseıge kórsetken qyzmettik kýáligi jaramsyz», - dedi Almaty ákimdiginen.
Alaıda, Almaty ákimdigi Shaımerdenniń buzaqylyq oqıǵasynan keıin qyzmettik kýálikke baılanysty Kadr bóliminiń jetekshisine sógis jarııalandy.
«Shaımerden qyzmettik kýáligin joǵaltyp alǵanyn aıtyp, qaıtarmaǵan. Sonda da Kadr bóliminiń jetekshisine sógis túrinde tártiptik shara qoldanyldy», - dedi qala basshylyǵynan.
Eske sala keteıik, 30 jastaǵy júrgizýshi jol-kólik oqıǵasynan keıin polıtseılerge qarsylyq kórsetip, izin sýytpaq bolǵan. Polıtseılerdiń júrgizýshiden qujattaryn kórsetýin talap etken ýaqytynda ol ákimdikten berilgen, merzimi ótip ketken qyzmettik kýáligin kórsetip, qoqan-loqqy jasaǵan. Endi Shaımerden 2 jylǵa bas bostandyǵynan aıyrylýy múmkin.
