Almaty polıtseıleri jolda tolǵaǵy bastalǵan áıeldi perzenthanaǵa jetkizdi
ALMATY. QazAqparat – Almatyda patrýldik polıtsııa qyzmetkerleri, tolǵaǵy kelgen júkti kelinshekti perzenthanaǵa jetkizdi,habarlaıdy QazAqparat tilshisi.
Oqıǵa 26 qazan kúni qalanyń ortalyq kósheleriniń birinde bolǵan.
«Meniń áriptesim, polıtsııa aǵa leıtenanty Ábdibaqyt Álimbetov ekeýmiz ekıpaj quramyndaǵy qyzmette boldyq. Ál-Farabı dańǵyly men Mendiqulov kóshesiniń qıylysynda bizge bir jolaýshy jolyqty. Ol kelininiń tolǵaǵy ustaǵanyn aıtyp shuǵyl túrde perzentahanaǵa jetýlerine kómektesýdi ótindi. Biz birden, basqa ekıpajdaǵy áriptesterimizdi shaqyrtyp, qyzmettik kóliktiń dabylyn qosyp júkti kelinshekti birneshe mınýtta perzenthanaǵa jetkizdik. Biz olar perzenthananyń qabyldaý bólimine kirgennen keıin ǵana jumysymyzǵa oraldyq», - dedi Almaty qalasy PD ákimshilik polıtsııa basqarmasynyń mamandandyrylǵan batalonynyń bas ınspektory, polıtsııa kapıtany Danııar Ábdisálimov.
Kóp uzamaı kómek kórsetken áıeldiń qyzdy bolǵanyn polıtsııa áleýmettik jelilerden bildi. Jańa bosanǵan kelinshektiń tátesi patrýl qyzmetkerlerine arnap alǵys post jazdy.
«Adam qalaı daıyndalsa da, ómirde kútpegen jaǵdaılarǵa tap bolady. Biz sondaı jaǵdaıdy basymyzdan ótkerdik. Biz perzenthanaǵa shyqqanbyz, alaıda ál-Farabı kóshesiniń boıynda kólik keptelisinde turyp qaldyq. Joldan polıtsııa kóligin kórip, kómek suradyq. Olar bizge shuǵyl kómekke keldi. Dabyldy iske qosyp, arttarynan júrip otyrýlaryn surady. Bir qarasaq artymyzda taǵy bir polıtsııa kóligi paıda boldy. Sodan keıin sanaýly mınýtta biz perzenthanaǵa jettik. Shamasy, bizdi sol jerde kútken bolý kerek, qaqpany ashyp qoıypty. Dál sol ýaqytta men jigitterge alǵys aıta almadym, sondyqtan olardyń adamgershilik qasıetterin aıtyp jelide bólisýdi jón kórdim. Sizderge úlken rahmet! »- dep jazdy jańa bosanǵan kelinshektiń qaıyn ápkesi Gúlmıra Súleımenova.
Búgin tártip saqshylary perzenthanada jatqan jas anaǵa bardy. Bul Aınur Myrzataevanyń tuńǵyshy eken. Dúnıege Jansaıa esimdi qyz kelipti.
«Buny eshqandaı erlik dep sanamaımyn. Mundaı adamgershilikti meniń kez kelgen áriptesim jasar edi. Biz jaı ǵana kómektestik. Sábı men anasyna myqty densaýlyq tileımiz. Bul ata-ana úshin úlken baqyt. Meniń de tórt balam bar. Buıyrsa, bir aıdan keıin besinshi balam dúnıege keledi», - dep szin túıindedi kapıtan D.Ábdisálimov.
