Almaty polıtseıleri jańa oqý jylynda jańa bastama kóterdi
ALMATY. 26 tamyz. QazAqparat - Almatylyq tártip saqshylary engizip otyrǵan balalardyń qaýipsizdigin qamtamasyz etýge baǵyttalǵan bul jańa bastama qalalyq bilim basqarmasymen birlese otyryp júzege asyryldy,
dep habarlady Almaty qalasy ІІD baspasóz qyzmeti.
Polıtsııa general-maıory Erlan Turǵumbaev tamyz konferentsııasyna qatysýshylar aldynda sóz sóılep, onda balalar qaýipsizdigi men olardyń oqý jyly kezindegi tárbıesi memlekettiń erekshe nazarynda ekendigin jetkizdi. Qalanyń bas polıtseıiniń aıtýyna qaraǵanda, Almaty qalasy ІІD búgingi tańda jasóspirimder arasynda oryn alatyn qylmystar sanyn 2 esege deıin azaıtý maqsatynda birqatar is-sharalar qabyldaǵan.
«El Prezıdenti balalar arasyndaǵy qylmystardyń sanyn azaıtyp, olardyń aldyn alý kerektigin birneshe ret basa aıtqan bolatyn. Osy oraıda 2007 jyly respýblıkamyzda alǵash ret mektep ınspektorlary jasaqtalyp, óz jumystaryna kirisken. Nátıjesinde qala mektepterindegi oryn alatyn qylmystar sany azaıyp, oqýshylar arasynda esirtkiniń taralýy men jasóspirimderdiń qylmystyq toptary joıyldy. Búgingi tańda Almaty qalasynyń mektepterinde bopsalaý, qarýly shabýyl jasaý, kisi tonaý sııaqty aýyr qylmystar múlde oryn almaıdy. Mektep ınspektorlarynyń qarqyndy jumys nátıjeleri arqasynda jyl basynan beri qala mektepterinde qandaıda bir qylmys jasaý faktileri múlde tirkelgen joq»,- dep atap kórsetti Almaty qalasy ІІD bastyǵy, polıtsııa general-maıory Erlan Turǵumbaev.
Al bıylǵy jyly qala polıtseıleri mektep oqýshylarynyń qaýipsizdigin qamtamasyz etý maqsatynda qalalyq jalpy bilim berý oryndarynda beıne kameralar ornatý kerektigin alǵa tartty. Nátıjesinde qala mektepterine kirý alańdary men aýmaqtaryna, dálizderge beıne kameralar ornatylyp, olardy baqylaý pýlti mektep basshysy kabınetine jáne mektep kúzeti qyzmetin atqaratyn fırmalarǵa qosyldy.
«Aldaǵy ýaqytta jalpy bilim berý oryndaryn biryńǵaı ortalyqtandyrylǵan júıe arqyly baqylaýdy Almaty qalasy ІІD-niń Jedel basqarý ortalyǵy júzege asyrmaq. Búgingi tańda 176 qala mektepterinde 1455 beıne kameralar ornatyldy. Bul jańa bastamany júzege asyrýǵa qala qorjynynan 98 mıllıon teńge bólindi. Jasóspirimder qylmysymen kúres máselesi qalalyq tártip saqshylarynyń jiti nazarynda. Al óz kezeginde mundaı ortalyqtandyrylǵan júıe arqyly balalar qaýipsizdigin qadaǵalaý, jasóspirimder arasyndaǵy qylmystardyń jolyn kesetinine senimdimin»,-dep málimdedi E.Turǵumbaev.
