Almaty polıtseıleri urlanǵan 14 jasar oqýshy qyzdy bosatyp aldy

Bul týraly búgin Almatyda ótken arnaıy baspasóz máslıhatynda Almaty qalasynyń ІІD-niń uıymdasqan qylmyspen kúres basqarmasynyń basshysy, polkovnık Valerıı Kozlov málim etti.

Jetinshi synypta oqıtyn ıÝlıa esimdi qyzdy jaqynda, kúndiz sabaǵynan shyqqan ýaqytta urlap ketken bolatyn. Qylmyskerler ony aldap, kólikke otyrǵyzyp, mektepten alyp ketken. Odan keıin olar qyzdyń uıaly telefony arqyly ákesine telefon soǵyp, 80 myń dollar aqsha suraǵan. Urlap ketkenderdiń bireýi aǵasynyń tanysy bolǵan.

JShS -tiń bas dırektory bolyp tabylatyn qyzdyń ákesi dereý bul jaıynda polıtsııaǵa habarlap, kómek suraıdy.

«Qalanyń ІІD birden arnaıy jedel-izdestirý tobyn qurdy. Oqıǵa bala ómiriniń qaýipsizdigine qatysty bolǵandyqtan, eń tájirıbeli polıtsııa qyzmetkerleri, sonymen qatar, «Arlan» arnaıy bólimshesiniń jaýyngerleri men UQK departamentiniń qyzmetkerleri jumyldyryldy. Qyzdy urlaǵandar ákesimen baılanysqa birneshe ret shyǵyp, aqsha alatyn oryndy qaıta-qaıta aýystyrdy. Degenmen de, polıtsııa qyzmetkerleri birden avtokólik markasyn anyqtap, Momyshuly men Jubanov kósheleriniń qıylysynda qylmyskerlerdi ustady. «Mersedes» kóliginde 23 jastaǵy Rýslan jáne 22 jastaǵy Osman esimdi jigitter boldy. Olar Almaty oblysy, Malovodnoe aýylynyń turǵyndary bolyp shyqty. Osy ýaqytta ekinshi top qyzdy tyǵyp otyrǵan qylmyskerlerdi anyqtady. Ony urlaǵandardyń biriniń 50 jastaǵy ákesi ustap otyrǵan. Qazir bul oqıǵaǵa qatysty úsheýi de túsinikteme berýde. Ustalǵandardyń bireýi buǵan deıin isti bolǵan. Úsheýiniń de esh jerde jumys istemeıtindigi anyqtaldy. Qazir 14 jastaǵy qyz aman-esen otbasymen birge», - dedi Valerıı Kozlov.

Onyń aıtýynsha, qazir qylmyskerler eki bap - (125 - adam urlaý, 181 - iri kólemde bopsalaý) boıynsha aıyptalýda.