Almaty polıtseıleri turǵyndardy tirkelmegen qarýlaryn ótkizýge shaqyrdy

Qalalyq ІІD Qoǵamdyq qaýipsizdik basqarmasynyń bastyǵy, polıtsııa podpolkovnıgi Serik Kenenbaevtyń aıtýynsha, óz erkimen qarýlaryn polıtsııaǵa tapsyrǵan azamattar qylmystyq jaýapkershilikten bosatylady.

Eske sala keteıik, qazirgi kezde Almatyda «Qarý» jedel-aldyn alý is-sharasy ótkizilýde. 20 qyrkúıek kúni bastalǵan sharanyń basty maqsaty - jedel ahýaldy saýyqtyrý, atys qarýy jáne jarylǵysh zattar men jarylǵysh qondyrǵylardy qoldaný arqyly jasalynatyn qylmystardy ashý, aldyn-ala eskertý. «Ereje boıynsha, «Qarý» jedel-aldyn alý is-sharasy kezinde polıtseıler tirkelgen qarý ıeleriniń barlyǵyn, arnaıy dúkender men kúzet fırmalaryn tekseretin bolady. Bul kúnderi aýyr qylmystardy jasaýda qarý qoldanatyn qylmyskerler men esepte turǵan buzaqylardy baqylaý kúsheıtiledi», - dep habarlady.

Shara kezinde kúsheıtilgen qyzmet túrimen qatar, almatylyq polıtsııanyń syrtqy qyzmeti de jumyldyryldy. Patrýldik polıtseıler, ýchaskelik ýákilder, jol polıtseıleri qarý men jarylǵysh zattardy saqtaýǵa baılanysty barlyq kúdikti adamdardy tekseredi.

Almaty qalasynyń ІІD lıtsenzııalyq-ruqsat etý júıesi qyzmetkerleriniń málimeti boıynsha, jedel-aldyn alý is-sharasy bastalǵaly beri zańsyz saqtalǵan 12 birlik qarý tárkilendi, onyń ishinde 1-sholaq myltyq, 3-tegis uńǵyly kezik, 6 gaz tapanshasy, 1 travmatıkalyq qarý, 59 oq jáne t.b. qarýlar alyndy. Tirkelgen qarýdyń 2271 jeke qojaıyndary tekserildi. Olardyń 144-i qarý saqtaý erejelerin buzǵany úshin ákimshilik jaýapkershilikke tartyldy.