Almaty polıtseıleri turǵyn úı aýlalaryn táýlik boıy baqylaýǵa kiristi

ALMATY. QazAqparat – Almatyny damytýdyń basty baǵyttarynyń biri – qoǵamdyq qaýipsizdik. Qalalyq Polıtsııa departamenti aýlalar men qarańǵy ýchaskelerdi eskere otyryp, patrýl júrgizý tártibin qaıta qarady. Bul týraly polıtsııanyń baspasóz qyzmetinen málim etti, dep habarlaıdy QazAqparat tilshisi.

Polıtsııa departamentiniń aqparatyna sáıkes, megapolıste qoǵamdyq tártipti qamtamasyz etý formaty ózgerdi. Budan bylaı, syrtqy qyzmetter turǵyn úı aýlalary men qoǵamdyq oryndarǵa jiti baqylaý júrgizedi.

«Ár aýdandaǵy barynsha krımınaldyq ýchaskeler men qylmys bolatyn jerler ýaqyt, kún, apta boıynsha saraptaldy. Jaıaý jáne avtoekıpaj narıadtary endi kópqabatty úıderdiń aýlalaryn da qadaǵalaıtyn bolady», - dep habarlady qalalyq Polıtsııa departamentiniń basshysy Serik Kúdebaev.

Alǵashqy aýysym ózderine tapsyrylǵan ýchaskedegi tártipti saǵat 08.00-16.00 aralyǵynda, ekinshisi saǵat 16.00-00.00-ge deıin, al úshinshi kezek 00.00-08.00 aralyǵynda qadaǵalaıdy. Árbir krımınaldyq ýchaskege qatysty aýlalardy túgel qamtıtyn jeke baǵyttar belgilendi. Munda jaıaý patrýldeýdiń ýaqyty, baǵyty kórsetilgen.

Qylmystyń aldyn alýǵa qatysty keshendi sharalardy júrgizýdiń nátıjesinde qoǵamdyq oryndarda jasalatyn qylmys deńgeıi 25,4%, kóshelerdegi qylmys 30,7% tómendegen.

«Sonymen qatar ákimshilik tártip buzýshylyqqa «nóldik tózimdik» prıntsıpi qalyptasýda. 111 myńnan astam ákimshilik tártip buzýshylyq anyqtaldy, aıyppul somasy 979 mln teńgeden astam. Qala polıtsııasy júrgizip jatqan eskertý sharalary quqyqtyq tártip pen azamattardyń qaýipsizdigin qamtamasyz etý jónindegi mindetterdi oryndaýǵa yqpal etetin bolady», - dep atap ótti S. Kúdebaev.