Almaty polıtseıleri taǵy bir alaıaqty ustady
ALMATY. Shildeniń 27-si. QazAqparat - Almatynyń Túrksib aýdanynyń 53-jasar turǵynynyń pysyqtyǵy sonshalyq, onyń keń kólemdegi qyzmet aýqymyna jer telimin taýyp berýge kómektesýden bastap,
otyrǵandardyń qylmys merzimin qysqartýǵa, sonymen qatar qamaýdan azat etýge járdemdesý de kirgen kórinedi. Árıne, óziniń mundaı «qyzmetin» Ivan óte joǵary baǵalaǵan, dep habarlaıdy oblystyq ІІD baspasóz qyzmetinen Gúlnár Jamanqulova.
«Negizinde, ol óziniń tanysynan 120 myń dollar alǵan jáne oǵan jer telimin taýyp berýge kómektesemin dep ýáde bergen. Taǵy bir adamnan kúdikti 50 myń dollar kóleminde aqsha alǵan. Ol oǵan qylmystyq iste kómektesemin jáne tutqyndaǵy adamdy qamaýdan shyǵaryp beremin dep ýáde etken. Jábirlenýshilerden aryz bizge budan birneshe kún buryn túsken bolatyn. Josparlanǵan jedel-izdestirý is-sharasynyń negizinde kúdikti anyqtalyp,ol qolǵa tústi», dep habarlady Medeý aýdandyq ІІB Krımınaldy polıtsııa bóliminiń bastyǵy, polıtsııa podpolkovnıgi Murat Qaspaqbaev.
Aıtqandaı, ustalǵan adam bul aqshalardy óziniń bıznesin damytý úshin tanystarynan tek qaryzǵa alǵanyn aıtyp aqtalýda. Onyń sózine qaraǵanda, máseleniń bári aqshany qaıtarylý ýaqytynyń kesheýildeýinde bolsa kerek. Shyndyǵynda, eki jábirlenýshiniń aıtýy boıynsha, bári kerisinshe.
«Ustalǵan kúdiktige aıyp taǵylyp, bizdiń bólimshede onyń ústinen 177-baptyń 3-bólimi boıynsha - asa iri kólemdegi alaıaqtyq boıynsha qylmystyq is qozǵaldy. Jaýap alý kezinde ol jer telimi úshin berilgen barlyq aqshany bir er adamǵa bergeni týraly aıtty. Ol muny ózinen kúmándi seıiltý maqsatynda aıtyp otyrýy yqtımal. Bizge málim bolǵany, ol buryn qylmystyq jaýapkershilikke tartylmaǵan», dep sózin tujyrymdady Murat Qaspaqbaev.
«Bul joly da alaıaqtyń salıqaly da zııaly túr-kelbeti azamattarǵa senim uıalatyp, olar esh kúdiktenbesten iri kólemdegi aqshalaı qarajattaryn beıtanys adamǵa bere salǵan. Jábirlenýshiniń ekeýi de Ivannyń olarǵa eshqandaı kúdik uıalatpaǵanyn, tipten onyń adamgershiligi mol jan sııaqty kóringenin aıtady. Negizinen, alaıaqtardyń kóbisi osyndaı eleýli qasıetterge ıe ekenin aıtady mamandar», dep tujyrymdaıdy Gúlnár Jamanqulova.
