Almaty polıtseıleri «Stop, trafık» jedel aldyn alý is-sharasyn júrgizýde
ALMATY. 1 qyrkúıek. QazAqparat /Ádilet Musahaev/ - «Stop, trafık» jedel aldyn alý is-sharasy adam saýdasy, jeńgetaılyq, adam urlaý men óz maqsatyna paıdalaný úshin bas bostandyǵynan aıyrý salasyndaǵy qylmystardy ashýǵa baǵyttalǵan,
dep málimdeıdi qalalyq ІІD baspasóz qyzmeti.
Bul qylmystyń aldyn alý men tyıý jolyndaǵy alǵashqy qadam adamdardy habardar etý bolyp tabylady. Jurtshylyqtyń keń aýqymyn qamtyǵan bul shara aldyn-ala saqtandyrý úlgilerimen tanystyryp, adam saýdasy, eńbek jáne jynystyq qanaýshylyqpen kúrestiń ádis-tásilderi men jazalaý turǵysynda órbidi.
«Sharany ótkizýde, sonymen qatar, úkimettik emes uıymdar men psıhologtar da belsendi atsalysýda. Negizinen, adam saýdasynyń qurbany bolatyndar, ásirese, jynystyq quldyqqa paıdalanylatyn jas kelinshekter. Olardyń kópshiligi óz otbasynyń jaǵdaıyn jaqsartý úshin saýdagerlerdiń shyrmaýyna túsedi. Sonymen qatar jeńil júristi qyzdardyń jartysy ózderi oryndaýǵa tıisti jumystyń sıpatynan habardar bolǵandar. Demek, olar jezóksheliktiń paıdasyna túsine tura óz erkimen barǵandar»,- dep habarlady Almaty qalasynyń ІІD Uıymdasqan qylmysqa qarsy kúres basqarmasynyń adam saýdasymen kúres bóliminiń bastyǵy Tańat Nazanov.
«Stop, trafıktiń» basty baǵyttarynyń biri jezókshelikpen aınalysýdyń astyrtyn núktelerin joıý bolyp tabylady. Shara barysynda adam saýdasymen aınalysatyndardy tutqyndaý men olardyń jolyn kesý, jeńgetaılyq, seks prıtondar ustaý, sonymen qatar jezókshelikke májbúrleý, jynystyq qyzmet kórsetýi úshin adamdardy urlaý men bas bostandyǵynan aıyrý maqsatynda jedel ýákildermen qalanyń barlyq kóńil kóteretin jáne oıyn-saýyq mekemeleri tekserilgen.
"Shara kezinde uıymdasqan qylmysqa qarsy kúres basqarmasynyń qyzmetkerleri 17-jasar Ózbekstan azamatshasyn aldaý jolymen jezókshelikpen aınalysýǵa tartqan Almaty oblysy Eńbekshiqazaq aýdanynyń 40-jasar turǵynyn ustady. Ol kórshi eldiń kámelettik jasqa tolmaǵan qyzyn birneshe aı buryn jynystyq qyzmet kórsetýge paıdalaný maqsatynda zańsyz jolmen alyp shyqqan. Nátıjesinde jynystyq quldyqtaǵy qyz kúsh qoldanýdan qorqyp, Jeltoqsan kóshesindegi jaldamaly páterde olardyń aıtqanyn oryndap kelgen. Klıentterdi jeńgetaı ózi alyp kelip otyrǵan. Qazirgi ýaqytta osy qylmysqa qatysy barlardyń bári anyqtalyp, ustaldy»,- dep sózin tujyrymdady T.Nazanov.
Jedel-aldyn alý is-sharasy aıasynda baqylaý kúsheıtilip, jeńil júristi qyzdar arnaıy esepke tirkelmek.
2011 jyldyń basynan beri ІІD UQQKB qyzmetkerlerimen adam saýdasynyń 9 faktisi anyqtalyp, onyń beseýine sot úkim shyǵarǵan. Bandynyń basshysy 10 jylǵa bas bostandyǵynan aıryldy. Sonymen birge tátip saqshylary adam urlaýdyń jáne zańsyz bas bostandyǵynan aıyrýdyń 10 faktisi, 20-ǵa jýyq jezókshelikpen aınalysýǵa tartý jáne jeńgetaılyqtyń 20 faktisi anyqtalǵan.
