Almaty polıtseıleri memleketaralyq izdeýde júrgen qylmyskerdi ustady
ALMATY. 24 qarasha. QazAqparat /Erlik Erjanuly/ - Almatyda qylmystyq top quramynda qaraqshylyq jasap, polıtsııadan boı tasalap júrgen Ózbekstan azamaty ustaldy. Qalalyq ishki ister departamentiniń Qylmystyq polıtsııa basqarmasynyń qyzmetkerleri ony Táshkent oblysyndaǵy áriptesteriniń járdemimen
Ózbekstandaǵy is-saparlarynda quryqtady. 21 jastaǵy Ózbekstan azamaty 2010 jyly Jetisý aýdanynda qylmystyq toppen 1 áıelge shabýyl jasap, onyń iri somadaǵy aqshasy bar qol sómkesin tartyp alǵan.
«Bul iske qatysty adamdardy biz sol kezde-aq anyqtaǵan bolatynbyz. Toptyń ózge músheleri Almaty qalasynyń aýmaǵynda quryqtalǵan bolatyn. Olardyń ishinde tek Ózbekstannyń osy azamaty ǵana el aýmaǵynan sytylyp shyǵyp, tergeý organdarynan boı tasalap júrgen edi. Júrgizilgen jedel-izdestirý is-sharasy barysynda izdeýdegi adamnyń boljaýly meken-jaıy anyqtaldy», - deıdi qalalyq ІІD Qylmystyq polıtsııa basqarmasy bastyǵynyń orynbasary Erǵalı Shakenov. Onyń aıtýynsha, qazaqstandyq jáne kórshiles elderdegi óz áriptesterimen tyǵyz baılanys ornatqan almatylyq polıtseıler jyl basynan beri Qazaqstan aýmaǵynda qylmys jasaǵan 167 qylmyskerdi jáne TMD elderinde ártúrli aýyr qylmystar jasaǵany úshin memleketaralyq izdeýde júrgen 217 adamdy izdep tabýǵa kómektesken. Sondaı-aq Almatyda qylmys jasaǵannan keıin qashqyndyq jolǵa túsken 300 qylmyskerlerdi áshkerelep, quryqtaǵan.
