Almaty polıtseıleri qoǵamdyq kólik júrgizýshilerin bopsalap kelgen topty quryqtady
ALMATY. 15 qarasha. QazAqparat /Ádilet Musahaev/ - Almaty qalasynyń tártip saqshylary qoǵamdyq kólik júrgizýshilerin bopsalaýmen aınalysyp kelgen qylmystyq topty quryqtady.
Qylmyskerlerdi ustaýǵa jekemenshik avtobýstyń 27 jastaǵy júrgizýshisi men kondýktory kómektesken. Qaskúnemder olardy qala syrtyna aparyp aıaýsyz urǵan. Odan keıin eki shuńqyr qazǵyzyp, talaptarymyzdy oryndamasańdar senderdi ólim kútip tur dep eskertken.
"Mundaı qorqytý tásili qylmyskerler úshin tıimdi bolǵan. Jasqanyp qalǵan júrgizýshi birneshe ret olarǵa 30 myń teńgeden berip otyrǵan. Jaqynda jábirlenýshi polıtsııaǵa júginýdi jón kórgen. Biz kúdiktilerdiń izine túsip, kezekti qylmystyq "marapattaý" ústinde qolǵa túsirdik",- deıdi Almaty qalasy ІІD uıymdasqan qylmyspen kúres basqarmasynyń bastyǵy Valerıı Kozlov.
Bopsalaýshynyń ekeýi de turaqty jumys orny joq almatylyqtar. Óz kinálaryn birden moıyndap, aqshadan qatty qysylǵandyqtaryn aıtyp aqtalǵan.
"Bizdiń paıymdaýymyzsha, ustalǵan ekeýi de qylmystyq bir topqa qatysy bar jáne mundaı aqsha tabý ádisin jıi paıdalanǵan. Biz osy qylmyskerlerden jábir kórgen taǵy eki júrgizýshini aıqyndadyq. Qazir bulardyń ústinen birden QR QK-niń 3-baby boıynsha adam urlaý, bopsalaý jáne tonaý boıynsha is qozǵaý máselesi qaralýda. Sondaı-aq, olar sońǵy oqıǵada júrgizýshi men kondýktordan 28 myń teńge jáne eki uıaly telefon, altyn saqına tartyp alǵan", -deıdi Valerıı Kozlov.
