Almaty polıtseıleri kitap oqý chellendjin bastady

ALMATY. QazAqparat - Almaty polıtsııasy «Oqıtyn departament» chellendjin bastady. Ol qalalyq polıtsııa departamentiniń búkil bólimshelerin qamtıdy, dep habarlaıdy QazAqparat tilshisi.

Polıtseıler arasyndaǵy kitap oqý chellendji Áýezov aýdandyq polıtsııa basqarmasynda bastaldy.

Munda jeke quram bos ýaqytynda jazýshy Aleksandr Bektiń «Volokolamsk tas joly» kitabyn oqyp shyqty.

Belgili bolǵandaı, polıtsııa qyzmetkerleriniń kópshiligi bul shyǵarmany birneshe ret oqyp úlgergen.

Tártip saqshylary kitapty árbir oqyǵan saıyn ondaǵy shyǵarma keıipkerlerinen jańa áser alatyndaryn atap ótti.

»Maqsat – jeke quramnyń rýhanı damýy. Qarbalas jumys kestesimen biz súıikti kitaptarymyzdy, jańa, ózekti shyǵarmalardy oqýǵa ýaqyt pen múmkindik taba almaıtynymyzdy moıyndaý kerek. Chellendj bir rettik naýqan emes. Budan bylaı jaýyngerlik jáne qyzmettik daıyndyqqa kitaphana saǵattary engiziledi. Al aldaǵy ýaqytta bizdiń departamenttiń ishinen kórkem, klassıkalyq, derekti jáne arnaýly ádebıetterdiń mol muraǵaty bar kitaphana ashý josparlanyp otyr», – dedi Almaty qalalyq Polıtsııa departamenti bastyǵynyń orynbasary Oljas Myrzabekov.

Aıta keteıik, «Volokolamsk tas joly» kitabynda Máskeý túbindegi Volokolamsk baǵytynda 1941 jyldyń kúz-qys aılarynda fashıstik basqynshylarmen shaıqasqa qatysyp, janyn qıǵan keńes jaýyngerleri men ofıtserleriniń erligi baıandalady.