Almaty polıtseıleri kisi óliminiń izin sýytpaı ashty
ALMATY. Tamyzdyń 9-y. QazAqparat /Ádilet Musahaev/ - Almatydaǵy Janqoja batyr kóshesiniń jıeginde sózge kelip qalǵan eki jas jigittiń qarym-qatynasy pyshaq jumsaýmen jalǵasyp,
sońy adam ólimimen tynǵan.
«Eki azamattyń janjalyna kýá bolǵan jergilikti turǵyndar polıtsııaǵa habarlaǵan. «Quqyqtyq tártip» jumystaryn júrgizý kúnderi bolǵandyqtan biz barlyq jumysty kúsheıtken edik. Sonyń arqasynda 5 mınýt ishinde áskerı boryshyn óteýshiler men ýchastkelik ınspektor oqıǵa ornyna shuǵyl jetken. Ol ýaqytta qylmysker jasyrynyp ta úlgergen. Biraq jaıaý toptyń uıymdastyrǵan tekserý jumystary nátıjesin berdi», deıdi Alataý aýdandyq ІІB-nyń bastyǵy polıtsııa polkovnıgi Qasym Áshirov.
Adam óltirgen qylmysker Almaty oblysy Uıǵyr aýdanynyń 19 jasar Asan atty turǵyny bolyp shyqty. Ol qurban bolǵan Serikpen bir jyldan artyq tanys ekendigin jetkizgen.
«Qylmyskerdi quryqtaý kezinde ol qylmysqa aıǵaq pyshaqtan arylý úshin aǵyp jatqan sýǵa laqtyrǵan. Biraq ta pyshaq tabylyp, qylmystyq iske tirkeldi. Belgili bolǵandaı, jas qylmysker osy aýdanda ýaqytsha turyp jatqan. Almatyǵa jumys isteý úshin kelgen azamat buryn qylmystyq jaýapqa tartylmaǵan», deıdi polkovnık Q.Áshirov.
Jedel medıtsına qyzmetkerleriniń aıtýynsha, mert bolǵan adam júrekke salynǵan pyshaqtyń saldarynan til tartpaı ketken.
