Almaty polıtseıleri karantın talaptaryn túsindirýde
ALMATY. QazAqparat – Almaty polıtsııasy turǵyndar arasynda karantın talaptaryn túsindirý jumystaryn kúsheıtti, dep habarlaıdy QazAqparat tilshisi.
Almaty qalasynyń polıtsııa qyzmetkerleri monıtorıng toptyń quramyna kirgen. Tártip saqshylary turyǵyndar arasynda karantındik sharalardyń mańyzdylyǵyn túsindirip jatyr.
«Birinshiden, biz betperde rejımin saqtaý týraly aıtamyz, ol búginde azamattardy qorǵaýdyń eń negizgi ádisteriniń biri.Tájirıbe kórsetkendeı, keıbireýler karantın talaptaryn saqtaýdy múldem toqtatqan: olar medıtsınalyq betperdelerdi sheship, qonaqqa baryp júr, qoldaryn jáne úılerin antıseptıkpen tazalaýdy umytqan. Al bul koronavırýs ınfektsııasynyń taralýyna áser etetin tikeleı faktor. Osyǵan baılanysty azamattardyń jappaı demalý oryndarynda jáne qoǵamdyq kólikterde karantın talaptaryn túsindirý jumystary kúsheıtildi. Polıtsııa qyzmetkerleri, epıdemıolog qyzmetkerler jáne aýdan ákimdikteriniń qyzmetkerlerinen qurylǵan ondaǵan mobıldi top óz jumystaryn jalǵastyrýda», –deıdi Almaty qalasy Polıtsııa departamenti bastyǵynyń orynbasary Nurlan Almasbekov.
Tártip saqshylary almatylyqtardy maska rejımin, áleýmettik araqashyqtyqty jáne karantındik talaptardy qatań saqtaýǵa shaqyrady.
«Bul Sizdiń jáne jaqyndaryńyzdyń densaýlyǵynyń qaýipsizdiginiń kepili. Árqaısymyzdyń qaýiptiń seıilmegenin jáne qorǵanys quraly ınfektsııanyń taralýyn barynsha azaıtýǵa kómektesetinin túsinýimiz mańyzdy. Qandaı da bir sebeptermen betperde rejımin saqtamaıtyn azamattar úshin ınspektorlar medıtsınalyq betperde kııý kerektigin eske salyp, betperde usynady. Mundaı jumys barlyq jerde júrgiziledi», – dep qorytyndylady Nurlan Almasbekov.
