Almaty polıtseıleri qaraqshylyq jolmen shyǵatyn ónimderge qarsy qatań kúresýde
ALMATY. Aqpannyń 26-sy. QazAqparat /Ádilet Musahaev/ - Sońǵy eki kún kóleminde Almaty polıtseıleri 15 myńnan astam qaraqshylyq jolmen jasalǵan aýdıo jáne beıne taspa ónimderin tárkiledi,
dep habarlaıdy QazAqparat ІІB baspasóz qyzmetine silteme jasap.
Qaraqshylardyń biri óz ónimin «Alataý» bazarynda saýdalaǵan. Sol kúni Shyǵys Qazaqstan oblysynyń turǵyny bolyp keletin jas jigit bes myńdaı zańsyz jolmen daıyndalǵan taspalardy shyǵarǵan.
«Bul avtorlyq quqyqtyń buzylýymen jasalǵan, jalǵan ónim bolyp tabylady. Mundaı taýarlar tárkilengennen keıin, mindetti túrde joıylýy kerek», deıdi ІІB-nyń krımınaldy polıtsııa basqarmasynyń «K» bóliminiń bastyǵy, maıor Aleksandr Nejınskıı.
Mundaı zańsyz ónimmen qarsy kúres kezinde taspalardyń ákelinetin arnalary men olardyń quryqtalynyp, joıylý jumystary mańyzdy. Ótken jyly Almaty polıtseıleri osyndaı ónimderdi Reseıden tasymaldaıtyn úsh iri arnany ustaǵan bolatyn. Esterińizde bolsa olar óz taýarlaryn Ekaterınbýrgtan ákep, ortalyq múliktik bazardaǵy qoımada saqtaǵan. Qaraqshylyq jolmen ákelingen taspalardy saqtap, taratý men aınalysyp kelgen jas almatylyq bolǵan edi. Sol arqyly tergeýshiler tabys kóziniń negizgi tulǵalaryna shyqqan bolatyn.
«Qaladaǵy saýda ortalyqtarynda júrgizilgen tekseris jumystary arqasynda jalǵan aýdıo jáne beıne taspalardyń ártúrli dúńgirshekterde jáne taǵy basqa jasyryn oryndarda satylatyndyǵy belgili boldy. Qazirgi tańda polıtseılerdiń, naqtyraq «K» bólimshesiniń aldynda zııatkerlik jáne avtorlyq quqyqty barynsha qorǵaý tapsyrmasy tur», deıdi maıor Nejınskıı.
Ótken jyly Almaty qalasy saqshylary zańsyz aınalymdaǵy 180 myńnan asa ónimdi tárkilep, ondaı zattardy shyǵaratyn 4 iri tseh pen jalǵan taspalardyń danasyn kóbeıtetin 30 arnaıy tehnıkany tárkilegen.
