Almaty polıtseıleri iri kólemde zańsyz esirtki aınalymyn áshkereledi
ALMATY. Qyrkúıektiń 21-i. QazAqparat /Erbol Turymbetov/ - Bul jolǵy júrgizilgen arnaıy operatsııanyń nátıjesinde Almatyǵa ońtústik aımaqtardan keldi dep joramaldanyp otyrǵan esirtki tasymaldaý arnasy joıyldy,
dep habarlaıdy QazAqparat.
Al jetkizý arnasynyń sońǵy núktesi Almaty qalasy Áýezov aýdanynda turatyn 37 jasar azamat bolyp shyqty. Onyń mindeti ákelingen taýardy taratyp satý jumystary bolǵan.
«Jaqynda kúdikti óz tutynýshysyna esirtkini Saın jáne Qabdolov kósheleriniń qıylysynda satpaq bolyp kelisti. Satýshy E. esimdi azamatqa geroınniń 4 chegin 18 myń teńgege satýǵa ýáde bergen. Esirtki ákelýshi sol jerde aıǵaqty zattarmen ustaldy. Bul operatsııaǵa biz shuǵyl áreket etýshi arnaıy jasaqty da tarttyq. 1 myń, 2 myń jáne 5 myńdyq teńge nomınaldy aqsha túrleri tárkilendi. Qolǵa túsken azamat óziniń bar kinásin esh qysymsyz moıyndady», dedi Almaty qalalyq ІІD esirtkimen kúres basqarmasynyń bastyǵy Denıs Loskýtov.
Sonymen qatar, esirtki saýdalaýshy geroınniń negizgi bóligin óziniń úıinde saqtap otyrǵanyn aıtqan. Ol oryn arnaıy izdeý quralynyń kómegimen anyqtalǵan.
«Biz qazir bul esirtki tasymaly baǵytyn anyqtap otyrmyz. Jaqyn ýaqytta ol arna túpkilikti joıylady. Aldaǵy ýaqytta narkotrafıkke qarsy, esirtki jetkizilýiniń faktilerin shekteý jáne saýdalaýshylardy qylmystyq jaýapkershilikke tartý jumystaryn kúsheıte túsemiz», deıdi Denıs Loskýtov.
