Almaty polıtseıleri iri kólemde esirtki satýdyń aldyn aldy
ALMATY. 11 sáýir. QazAqparat /Názıra Eleýhan/ - Almatyda iri kólemde esirtki satýmen aınalysyp júrgen 30 jastaǵy Ózbekstan azamaty ustaldy. Aıyptalýshydan tabylǵan 250 gramm geroın - bir jarym mıllıon teńgege baǵalanyp otyr.
«D. esimdi azamattyń sońynan eki aptadan asa ýaqyt ańdydyq. Ol qala ortalyǵyndaǵy qymbat úıde páter jaldap turyp jatqan. Úlken kólemde taýar satady-aý degen kúni ony ustaýǵa kiristik. Operatsııa keshe keshkisin saǵat 7-ler shamasynda Dostyq jáne Mıtın kósheleriniń qıylysynda ótti. Ony tekserý barysynda kúrtesiniń qaltasynan 4 gramm geroın tabyldy. Ol taýarynyń negizgi bóligin satyp alýshyǵa óziniń páterinde bermek bolǵan eken»,-dedi Almaty qalasynyń esirtki bıznesimen kúres basqarmasynyń bastyǵy, polıtsııa maıory Denıs Loskýtov.
Qalalyq esirtkimen kúres qyzmetkerleriniń aıtýynsha, ol ár iri kólemdegi saýdasyn jasaǵannan keıin, óz eline, Úshqudyq qalasyna qaıtyp otyrǵan.
«Ázirge, esirtkilerdiń Almatyǵa ákelinetin naqty joly anyqtalǵan joq. Biraq, birshama málimetter bar. Qazir, esirtki ákelýshilerdiń betin ashý boıynsha naqty jospar qurylýda, jaqyn arada osy toptyń basqa da qatysýshylary quryqtalatyn bolady. Olardyń aty-jónderi bizge belgili»,-dedi D. Loskýtov.
