Almaty polıtseıleri «Halyq alǵysy» medalimen marapattaldy
ALMATY. QazAqparat - Almatyda tótenshe jaǵdaı men karantın jaǵdaıynda erekshelengen 49 polıtsııa qyzmetkeri arnaıy medalmen marapattaldy, dep habarlaıdy QazAqparat tilshisi.
Qazaqstan Respýblıkasy Prezıdenti Qasym-Jomart Toqaevtyń Jarlyǵymen qyzmettik mindetterin adal oryndaǵany úshin jáne pandemııamen kúrestegi sińirgen eńbegi úshin Almaty qalasy polıtsııa departamentiniń 49 qyzmetkeri «Halyq alǵysy» medalimen marapattaldy.
Marapattaý rásimi sanıtarlyq talaptardy qatań saqtaı otyryp, polıtsııa bazasynda ótti.
«Bıyl 19 naýryzdan bastap qalada karantındik rejım engizildi. Shahardyń syrtqy shekarasynan tys jerlerde kólik quraldarynyń kirýi men shyǵýyn shekteý úshin onyń perımetri boıynsha 27 blok beketteri quryldy, oǵan ýchaskelik ınspektorlar, patrýldik polıtsııa Polkiniń, JQAJ jáne PD ortalyq keńsesiniń qyzmetkerleri tartyldy. Barlyǵy 679 qyzmetker jumyldyryldy. Sonymen qatar, qalanyń ózinde zańdylyq pen tártipti qamtamasyz etý úshin jaıaý patrýlder men tosqaýyl postarynyń jumysy kúsheıtilgeni ras. Bul qyzmetti 2500-den astam polıtsııa qyzmetkeri men Ulttyq ulan qyzmetkerleri atqardy. Sonymen qatar, polıtsııa, ınfektsııa oshaqtarynda qoǵamdyq tártipti qorǵaýdy qamtamasyz etti, al onyń taralýynyń alǵashqy kezeńinde jedel shtab naýqastarmen baılanysta bolǵan adamdardy anyqtady. Jeke quramnyń aldynda turǵan mindetter óte mańyzdy bolǵanyn atap ótemin jáne olar ony sheshe bildi. Medıtsına qyzmetkerlerimen birge polıtsııa qyzmetkerleri táýlik boıy kezekshilik atqardy, bul birinshi kezekte KVI ınfektsııasynyń qaýpin azaıtýǵa jáne qaladaǵy qylmystyq ahýaldy turaqtandyrýǵa baǵyttalǵan», – dedi Almaty qalalyq Polıtsııa departamentiniń basshysy Qanat Taımerdenov.
