Almaty polıtseıleri bir apta ishinde TJO jumysshylary jasaǵan úsh kólik urlaý qylmysyn áshkereledi
ALMATY. Qyrkúıektiń 8-i. QazAqparat - Qaladaǵy bir tehnıkalyq jóndeý ortalyǵynyń mehanıgin «Toıota Kamrı» avtokóligi qatty qyzyqtyrsa kerek. Kólik qojaıyny qozǵalys bóliginiń aqaýlaryn jóndetýge kelip, temir tulpar kiltin senip tastap ketkendigin paıdalanǵan ol, kólikti qýyp ketken, dep habarlaıdy Almaty qalalyq ІІD baspasóz qyzmetinen Talǵat Seıilbaev.
«Abaı kóshesi boıynda ornalasqan bul tehnıka jóndeý ortalyǵy kólik qojaıynynyń jumys ornyna jaqyn bolǵandyqtan A. esimdi azamat tańerteńgi segizder shamasynda kóligin jóndetýge qaldyryp, tús mezgilinde alyp ketpek bolǵan. Alaıda tehnıkalyq jóndeý ortalyǵynyń sheberi kólik quralyn tekserýden ótkizip, aqaýlaryn retteýdiń ornyna janyndaǵy áriptesterine de eskertpesen, kólikti aıdap ketip qalǵan. Bul kólik urlyǵy týraly málimetti polıtsııa organdaryna kólik ıesi habarlaǵan», - dep atap ótti Almaty qalasy ІІD Jol polıtsııa basqarmasy bastyǵy Arman Sarbasov.
Qala boıynsha júrgizilgen «Quryqtaý» is-jospary nátıjesinde kúdiktini jol saqshylary Abaı men Baıtursynov kósheleriniń qıylysynda qolǵa túsirigen. Úı aýlalaryn paıdalanyp iz jasyryp ketpek nıette bolǵan 25 jastaǵy jigit polıtsııa qyzmetkerleriniń talaptaryna baǵynǵysy kelmegen. Degenmen de qylmysker quryqtalǵan.
«Kúdikti buǵan deıin de kólik urlaǵany úshin qylmystyq jaýapkershilikke tartylǵandyǵy anyqtaldy. Aıta ketetin bolsaq, qaladaǵy kóptegen TJO-nyń ákimshiligi jumysshylardy jumysqa qabyldaý kezinde, olardyń qylmystyq jaýapkershilikke tartylǵandyǵy týraly málimetke asa mán bere qoımaıdy. TJO-da oryn alatyn kólik urlaý qylmystaryn buryn sottalǵan azamattar isteıtini belgili. Polıtsııa tájirıbesine súıene otyryp aıtatyn bolsaq, egerde kólik quraldary TJO-nyń aýmaǵynan urlanatyn bolsa, eń birinshi ortalyq jumyskerleri men onyń ujymy muqııat tekseriletin bolady», - dep málimdedi polkovnık Sarbasov.
Al Baıanaýyl kóshesinde ornalasqan TJO-nyń 21 jasar kólikqumar sheberi aqaýlaryn jóndep bitkennen keıin, zańdy belden basyp, temir tulpardy qýyp ketken. Sonymen qosa júrgizýshilik tájirıbesi joq, eshqandaı jaýapkershilikti sezinbegen jas kólik urlaýshy óziniń nemquraıdylyǵy arqasynda Raıymbek kóshesi boıynda jol-kólik apatyna sebepker bolyp, oqıǵa ornynan birazǵa uzap ketken bolatyn. Arnaıy batalonnyń kúdigin týdyrǵan ol Fýrmanov pen Qabanbaı kósheleriniń qıylysynda qolǵa túskennen keıin ǵana kóliktiń urlanǵandyǵy anyqtalǵan. Eki jaǵdaıda da kólik urlaǵan qylmyskerler Almaty qalasynda turaqty meken-jaılary joq, elimizdiń basqa aımaǵynan kelgen azamattar ekendikteri belgili boldy.
