Almaty polıtseıleri aqsha bopsalaǵan eki azamatty ustady
ALMATY. Qyrkúıektiń 3-i. QazAqparat /Ádilet Musahaev/ - Jaqynda eki jumyssyz azamat ózderiniń burynǵy áriptesterin jaldamaly páterge qamap, qaryzǵa bergen 3 myń AQSh dollaryn ýaqytynda qaıtarmaǵany úshin 10 myń dollar talap etken, dep habarlaıdy QazAqparat Almaty qalasy ІІD-niń baspasóz qyzmetine silteme jasap.
«Atalmysh qylmystyq oqıǵa boıynsha júrgizilgen tergeý jumystary nátıjesinde belgili bolǵandaı qaryz alýshy óziniń jazǵan qolhatynda alǵan aqshasyn osy jyldyń 31-shi tamyzynda qaıtarý kerek bolǵan. Birer kún buryn Saıyn men Tóle bı kósheleriniń qıylysynda eki jaqtyń kezekti kezdesýi bolǵan. Kezdesý barysynda qaryz berýshiler qaryzdanýshyny kúshtep kólikke kirgizip, aldyn ala "Kóktem" yqshamaýdanynda jaldap qoıǵan páterlerine aparǵan», deıdi Áýezov aýdandyq ІІB-nyń bastyǵy Ábilǵazy Tólepbergenov.
Qaryz berýshiler oǵan qoqan-loqqy kórsetip, týystaryna qońyraý shalyp, talap etken aqshany ákep berýin suraıdy. Biraqta jábirlenýshi ápkesine qońyraý shalmaq bolyp «102» operatoryn terip, qomaqty aqsha talap etip otyrǵan adamdardyń qursaýynda otyrǵanyn aıtyp aılakerlik jasaǵan.
"Osyǵan oraı ІІD jedel Basqarma ortalyǵy jyldam is-qımyl jasap, qońyraýdyń qaı jerden shalynǵanyn anyqtady. Birer mınýt ótisimen eki «Býran» sholǵynshy ekıpajy, Bostandyq aýdandyq ІІB-nyń ýchastkelik ınspektorlary jáne krımınaldy polıtsııa qyzmetkerleri úıge jetkizildi. Mundaı áreketti kútpegen kúdiktiler tutqyndalyp, polıtsııa bólimine jetkizildi», deıdi Á. Tólepbergenov.
Bul iske qatysty 3-ýi de buryn qaladaǵy fırmalardyń birinde kúzetshi bolyp istegen eken. Qazir bulardyń barlyǵy jumyssyz. Tergeýshiler bul isti túpkilikti tekserip, taraptardyń azamattyq-is júrgizý jolymen sheshýleri tıis bolǵandyǵyn aıtady. Endi biraz tergeý jumystarynan keıin qaryz berýshilerdi sot kútip tur.
