Almaty polıtseıleri aqsha aıyrbastaý ornyna shabýyl jasaǵandardy quryqtady
ALMATY. Qyrkúıektiń 20-sy. QazAqparat /Ádilet Musahaev/ - Almaty polıtseıleri aqsha aıyrbastaý ornyna shabýyl jasaǵandardy quryqtady, dep habarlaıdy QazAqparat, Almaty qalasy ІІD-niń baspasóz qyzmetine silteme jasap.
Esterińizde bolsa tamyz aıynyń sońynda belgisiz úsheý Jeltoqsan dańǵyly boıyndaǵy aqsha aıyrbastaý ornynyń menedjerine shabýyl jasap, 200 myń AQSh dollary salynǵan sómkeni alyp ketken bolatyn. Onymen qoımaı qylmyskerler travmatıkalyq tapansha paıdalanǵan edi.
"Mundaı kezde biz kóbinde aqsha aıyrbastaý ornynyń ıesi men jumysshylaryn tekseremiz. Qylmyskerler iri kólemdegi aqshanyń tasymaldanatynyn bilgen. Olar keńseden qaı ýaqytta, qansha menedjer shyǵatynyn da bilip otyrǵan. Tergeý jumystary kezindegi iz buryn osy orynda jumys istegen jáne olardyń jumys kestesin jaqsy biletin aqsha aıyrbastaý pýnkti ıesiniń týysqanyna alyp keldi", deıdi krımınaldy polıtsııa basqarmasynyń bastyǵy, polıtsııa polkovnıgi Amangeldi Shiderqulov.
Tyńshylar tórt kúdiktiniń de turǵylyqty jerin anyqtaǵan. Olardyń barlyǵy Almatyǵa qylmystyq jolmen aqsha tabýǵa kelgen Almaty oblysy, Uıǵyr aýdanynyń turǵyndary bolyp shyqqan. Qylmyskerler shabýyl josparyn jaldamaly páterlerinde 3-4 kúnde oılastyryp, kim ne isteý kerektigin ózara bólisken.
"Sońǵy kompıýterlik tehnologııany paıdalaný atalmysh qylmystyq isti ashýda óz kómegin tıgizgenin aıta ketýimiz kerek. Óıtkeni keńsege kire beriste beıne kamera qoıylǵan. Beıne materıaldy qaraı otyryp biz urylardyń kim ekenin aıqyndaı almadyq, óıtkeni olar «Kúzet» arnaıy qaraýylynyń kıimin kıgen. Bastarynda bas kıimderi bolǵandyqtan olardyń túrleri jóndi kórinbedi. Degenimen olardyń sany men jasyrynǵan kóligi bizge belgili boldy", dep atap ótti A.Shiderqulov.
Qazirgi ýaqytta tergeý jumystary qylmystyq iske qatysty barlyq aıǵaqtardy tapqan. Ustalýshylar óz kinálaryn tolyqtaı moıyndaýda, biraq polıtseıler olardyń basqa da qylmystyq áreketterge qatysy bar, joqtyǵyn tekserýde.
