Almaty polıtseıleri 17 jastaǵy qyzdy quldyqtan qutqardy
ALMATY. QazAqparat - Almaty polıtseıleri iz-túzsiz joǵaldyǵa sanalǵan 17 jastaǵy qyzdy tapty, dep habarlaıdy QazAqparat tilshisi.
Polıtseılerdiń aıtýynsha, 17 jastaǵy qyz qyrkúıek aıynda úıinen shyǵyp ketip, qaıtyp oralmaǵan.
«1993 jáne 1995 jyldary týǵan kúdiktilerdiń 17 jastaǵy qyzdy seksýaldy quldyqqa salýyna qatysty aqparatty muqııat tekserdik. Jaqsy aqsha tabamyn dep oılaǵan qyz basynda atalǵan árekettiń qaýiptiligin jete túsinbegen. Sondyqtan, tanystarynyń usynysyna kelisimin bergen. Biz ony arashalaǵanǵa deıin jynystyq qyzmet kórsetken. Aǵaıyndary onyń qaıda bolǵanyn bile almaǵan. Ol iz-túzsiz joǵaldyǵa sanalyp keldi», - dedi Almaty qalasy ІІD-niń Uıymdasqan qylmyspen kúres basqarmasynyń basshysy, polıtsııa podpolkovnıgi Berik Ábilbekov.
Qazir qyz ata-anasyna qaıtaryldy. Kúdiktilerge qatysty QR QK 134 baby boıynsha is qozǵaldy.
