Almaty polıtseıinde myńǵa jýyq nashar otbasy esepte tur

Bul otbasylarda 1200-ge jýyq bala tárbıelenýde jáne olardyń basym bóligi mektepke barmaıdy, dep habarlaıdy QazAqparat Almaty qalasy ІІB-nyń baspasóz qyzmetine silteme jasap.

Mundaı balalar quqyǵynyń buzylýyn kámeletke tolmaǵandar isimen aınalysatyn ınspektorlar jiti tekserip otyrady.

«Ádette, nashar otbasylardyń balalary ata-analarynyń spırtti ishimdikke sylqııa toıyp, olardy kóshege qańǵyrtyp jiberýleri saldarynan bizge túsip jatady. Qazirgi tańda Almatyda 683 bala mektepke barmaıdy. Jyl basynan beri ata-analyq tárbıe berý mindetin oryndamaǵany úshin 16 adam ata-analyq quqyǵynan aıyrylsa, 71-i balalarǵa laıyqty tárbıe bermegendigi úshin ákimshilik jaýapqa tartylǵan», deıdi Almaty qalasy QQB-nyń kámeletke tolmaǵandar isi ınspektsııasynyń aǵa ınspektory, polıtsııa maıory Rahym Tolaqulov.

Qalanyń 1-shi yqshamaýdanyndaǵy osyndaı otbasynyń birinde eki jasóspirim ósip keledi. 4 jasar Svetlana men 7 jastaǵy Andreı taıaqpen uryp tárbıelep kele jatqan analaryna jıirkenishpen qaraýda.

«Óz ákemizdi kórmegeli kóp boldy, al sheshemizdi jek kóremiz. Ol ylǵı da ishedi ári bizdi urady. Keıde ol úıden eki-úsh kúnge ketip qalady, al biz qaryndasym ekýimiz ash júremiz», deıdi kishkentaı Andreı.

Aǵymdaǵy jyldyń jeti aıynda ákimshilik quqyq buzǵany úshin 2990 kámeletke tolmaǵandar polıtsııaǵa jetkizilgen. Onyń 1761-i qoǵamdyq orynda mas kúıinde júrse, 3-i esirtki qoldanǵan, taǵy 783-i qoǵamdyq oryndarda temeki shekkeni úshin ákimshilik jaýapqa tartylǵan.