Almaty perzenthanasynda jańa týǵan náreste kóz jumdy
ALMATY. QazAqparat - Almatyda polıtseıler jańa týǵan náresteniń ólimine qatysty tergeýdi bastady, dep habarlaıdy QazAqparat tilshisi.
Facebook paraqshada jarııalanǵan vıdeoda bosanǵan áıeldiń anasy qyzynyń júktiligi asqynýsyz ótkenin aıtady. Ol dárigerlerdiń tekserýine ýaqytynda baryp júrgen. PTR testin de tapsyrǵan.
«Túngi saǵat 1-de qyzym bizge qońyraý shalyp, balanyń shetinep ketkenin aıtty. Oǵan balany qolyna ustap, qoshtasý úshin bergen. Bizge náresteniń denesin tańerteń Qalqaman máıithanasynan alyp ketý kerek dedi. Erteńgisin biz máıithanaǵa bardyq, biraq ol jerden balanyń denesin tappadyq. Ony alyp ketken eken. Biz onyń denesin kesýge kelisim bergen joqpyz. Biz polıtsııa shaqyrdyq. Munyń bárin anyqtaǵymyz keledi. Bala aı-kúnine jetip týdy»,– deıdi bosanǵan áıeldiń anasy.
Qalalyq qoǵamdyq densaýlyq saqtaý basqarmasy atap ótkendeı, Almaty qalasynyń 19 jastaǵy turǵyny perzenthanaǵa 2020 jyldyń 18 qarashasynda túsken.
«Ana men balaǵa qajetti barlyq medıtsınalyq kómek kórsetildi. Qarqyndy terapııa men reanımatsııa sharalaryna qaramastan, jańa týǵan náreste 19 qarasha kúni shetinep ketti», - dep túsindirdi basqarmadaǵylar.
Balanyń ólimine qatysty qyzmettik tergeý júrip jatyr.
Sondaı-aq, Almaty qalasy Bostandyq aýdanynyń polıtsııa basqarmasy tergeý sharalaryn bastady.
