Almaty ózenderinde selden qorǵaıtyn bóget salynyp jatyr
ALMATY. QazAqparat - Almaty ákimi Baqytjan Saǵyntaev Aıýsaı ózeniniń saǵasynan tómen Aqsaı men Úlken Almaty ózen basseınderindegi selden qorǵaıtyn bógetterdiń qurylysyn tekserdi, dep habarlaıdy QazAqparat tilshisi.
Úlken Almaty men Aqsaı ózenderiniń joǵarǵy aǵysynda 114 muzdyq pen 35 morena kól bar. Sý arnasynan tasysa 5 myńnan astam nysan men 40 myńnan astam adam qaýipti aımaqta qalýy múmkin.
Bul bógetter megapolıstiń Naýryzbaı, M.Áýezov pen Alataý aýdandarynyń turǵyndary men nysandaryn qorǵaýdy qamtamasyz etýge múmkindik beredi. Qurylystyń aıaqtalý merzimi - 2023 jyl.
Almaty ákimi sýmen jabdyqtaý men sý burý ınjenerlik jelileriniń qurylysy, sondaı-aq «Taýjoly» yqshamaýdanyndaǵy joldyń qalaı qalpyna keltirilip jatqanyn tekserdi.
«Turǵyndar jeli tartylǵan Dosmuhamedov magıstraldy kóshesiniń jaǵdaıyna alańdaýly. Joldy qalpyna keltirýdi bastaý úshin munda qalǵan 40 úıdiń ıesi jelige qosylýdy tezdetýi tıis. Qazirdiń ózinde merdiger daıyndyq jumysyn júrgizip jatyr», - dep jazdy Baqytjan Saǵyntaev Instagram -daǵy paraqshasynda.
