Almaty Otan qorǵaýshylar kúnin toılaýda

ALMATY. QazAqparat Almatylyqtar Otan qorǵaýshylar kúnin toılaýda. Basty mereke Abaı alańynda ótip jatyr. Jıyn saltanatty túrde memlekettik ánuranmen bastaldy.

«Bul kún ardagerler men shekara shebinde kirpik qaqpaı qyzmet etip turǵan sarbazdar men el azamattaryn ulyqtaıtyn memlekettik mereke. Táýelsizdikke qol jetken kezden bergi ýaqytta Elbasynyń syndarly saıasatynyń arqasynda memleket shekarasyn naqtylap basqa jurtpen dostyǵymyzdy nyǵaıttyq. Otandy qorǵaý isi qaı kezde de ár azamattyń qasıetti boryshy, abyroıly mindeti. Bas qolbasshy Elbasy Nursultan Nazarbaevtyń jiti baqylaýy men qamqorlyǵynyń arqasynda qorǵanys salasy qarqyndy damý ústinde. Qarjylandyrý jyl saıyn artyp, qarýly kúsh qurylymdary tehnıkalyq talaptarǵa saı damyp, qarý-jaraqpen jabdyqtalýda. Áskerı qyzmetkerlerdi áleýmettik qoldaý nazardan tys qalǵan emes. Elimizdiń qorǵanys qabiletin arttyrýǵa Almaty úles qosyp keledi. Ótken jyly qalamyzdan 2000 jas bozbala qarýly kúshter qurylymdaryna, memlekettik kúzet, shekaraǵa shaqyryldy. Jyl basynan beri 450 jas ulan ózge óńirlerge attandy», - dedi qala ákimi Baýyrjan Baıbek.
Respýblıkalyq ulandar desanttary men kýrsanttary áskerı qoıylym qoıdy. Sondaı-aq, áskerı qyzmet qataryna shaqyrylýshy 50 bozbalaǵa arnaıy syı-syıapat berildi. Qalalyq ardagerler keńesiniń tóraǵasy Erenǵaıyp Shaıhýtdınov jas sarbazdarǵa aq jol tiledi.
Merekelik shara Qazaqstan estrada juldyzdarynyń kontsertine ulasty. Sondaı-aq, Almaty jastary Otan qorǵaýshylar kúnine arnap fleshmob ótkizdi.