Almaty-Óskemen tasjolyndaǵy qubyrly ótkeldi shaıyp ketý deregine qatysty qyzmettik tekserý bastady

NUR-SULTAN. QazAqparat - «QazAvtoJol» UK» AQ Almaty-Óskemen baǵytyndaǵy qubyrly ótkeldi shaıyp ketý oqıǵasynyń mán-jaıyn egjeı-tegjeıli anyqtaý úshin qyzmettik tekserýdi bastady, dep habarlaıdy QazAqparat.

Belgili bolǵandaı, keń arnaǵa eń tómengi dıametri bar sýótkizgish qubyr jobalanǵan. Buzýshylyqtar anyqtalǵan jaǵdaıda kináli azamattar zańnamaǵa sáıkes jaýapkershilikke tartylady.

«Atalǵan ýchaskeniń qurylysy men jobalaýǵa kelisim-shart 2017 jyly jasalǵan. Dıametri 1,5 metr bolatyn qubyr qurylysynyń tehnıkalyq sheshimin Almaty qalasyndaǵy «Kazdorproekt» JShS ázirlep, «QazAvtoJol» AQ-nyń «Qurylys jónindegi dırektsııasy» fılıaly, «GK Injınırıng» JShS tehnıkalyq qadaǵalaý qyzmeti, CITIC Construction usynǵan merdiger tarapynan kelisilgen. Sondaı-aq, osyndaı jaǵdaıdyń aldyn alý maqsatynda respýblıkalyq mańyzy bar joldardyń barlyq ýchaskelerindegi qalǵan qubyrlar men mal ótkelderine tekseris júrgizilýde», - dep jazdy vedomstvodan.

Qazirgi ýaqytta qubyrly ótkeldi sý shaıyp ketken ýchaskede jóndeý-qalpyna keltirý jumystary jalǵasýda. Táýlik boıy patrýl uıymdastyryldy. Bul aımaq jabyq kúıinde tur.

Jóndeý-qalpyna keltirý jumystaryna 16 arnaıy tehnıka men 20-ǵa jýyq jol jumysshy jumyldyrylǵan.

Eske sala keteıik, 2022 jylǵy 22 mamyrda qatty jaýǵan jańbyrdan keıin aǵyndy sý jańadan salynyp jatqan Taldyqorǵan-Úsharal jolyn shaıyp ketken bolatyn. Іle-shala Almaty-Óskemen tas jolynyń 382-410 shaqyrymyn sý shaıyp ketýge baılanysty jabyldy.