«Almaty – Óskemen» tasjolynda jeńil kólik pen KamAZ soqtyǵysyp, 3 adam aýrýhanaǵa tústi
ShQO Polıtsııa departamenti baspasóz qyzmetiniń málimetine súıensek, jol-kólik oqıǵasy 8 tamyz kúni saǵat 09.00 shamasynda respýblıkalyq mańyzy bar «Almaty – Óskemen» tasjolynda bolǵan.
«Mersedes» markaly avtokóliktiń júrgizýshisi Jarma aýdany Qalbataý aýyly jaqtan Óskemenge qaraı kele jatty. Qalaǵa 11 shaqyrymdaı jer qalǵanda qaýipsizdikke kóz jetkizbeı, araqashyqtyq pen jyldamdyq rejımin saqtamaǵan júrgizýshi KamAZ-ben soqtyǵysty. Sonyń saldarynan «Mersedes» kóliginiń júrgizýshisi men 2 jolaýshysy jaraqat alyp, shuǵyl túrde medıtsınalyq mekemege jetkizildi.
«Júrgizýge qatysty QR ÁQBtK-niń 610-baby 1-bóligimen (kólik quraldaryn, júkterdi, joldardy, joldaǵy jáne basqa da qurylysjaılardyń nemese ózge de múliktiń búlinýine alyp kelgen, materıaldyq zalal keltirgen kólik quraldary júrgizýshileriniń jol júrisi qaǵıdalaryn buzýy) ákimshilik hattama toltyryldy. Bul bap boıynsha oǵan 20 AEK (69 000 teńge) mólsherinde aıyppul salynýy nemese alty aıǵa deıingi merzimge kólik basqarý quqyǵynan aıyrylýy múmkin», - delingen aqparatta.
