Almaty-Óskemen tasjolynda kólik jylqyǵa soǵylyp, bir adam mert boldy
«Aqsý aýdanyndaǵy Qyzylaǵash aýylynyń mańynda Toyota Crown avtokóligi jolǵa shyǵyp ketken jylqymen soqtyǵysqan. Saldarynan kólik aýdarylǵan.
27 jastaǵy júrgizýshi oqıǵa ornynda qaıtys boldy»,- delingen Jetisý oblystyq polıtsııa departamenti baspasóz qyzmetiniń habarlamasynda.
Qazir tergeý júrgizilýde.
Aıta keteıik, Aqsý aýdany Almaty-Óskemen tasjolynyń boıynda ornalasqan. Kólik apatynyń basym bóligi Qyzylaǵash aýylynyń mańynda bolady. Túnde týra joldyń boıynda turǵan jylqylardy respýblıkalyq trassada úlken jyldamdyqpen kele jatqan kólik júrgizýshileri kórmeı qalyp, apatqa ushyraıdy. Osy jaıttyń aldyn alý maqsatynda Aqsý aýdanynyń prokýrorlary tórt túliktiń moınyna túnde janatyn arnaıy baý taǵýdy usynǵanyn buǵan deıin habarlaǵan bolatynbyz.
