«Almaty-Óskemen» tasjolynda kólik qozǵalysy shekteldi

ÓSKEMEN. QazAqparat – «Almaty-Óskemen» tasjolynda júk kólikteri men avtobýstardyń qozǵalysyna shekteý qoıyldy, dep habarlaıdy QazAqparat tilshisi.

QR Indýstrııa jáne ınfraqurylymdyq damý mınıstrliginiń resmı Telegram kanalynda jarııalanǵan málimetke súıensek, 19 aqpanda saǵat 21:10-nan bastap Shyǵys Qazaqstan oblysynda aýa raıynyń nasharlaýyna, naqty aıtqanda kóktaıǵaq pen qarly boranǵa baılanysty «Almaty-Óskemen» tasjolynyń 778-967 shaqyrymynda jáne «Aıagóz-Qalbataý» tasjolynyń 971-1068 shaqyrymynda júk kólikteri men avtobýstardyń qozǵalysy shekteldi.

Osy rette, oblystyq Tótenshe jaǵdaılar departamenti turǵyndarǵa alys saparǵa shyqpaýǵa, joldardyń jaı-kúıin «Dármen» mobıldi qosymshasy arqyly tekserip otyrýǵa keńes beredi.

Esterińizge sala ketsek, osyǵan deıin Shyǵys Qazaqstanda aýa raıynyń nasharlaýyna baılanysty birqatar tasjoldyń jabylǵanyn habarlaǵan bolatynbyz.