Almaty-Óskemen tasjolynda 2 adam qaza taýyp, tórteýi aýrýhanaǵa tústi
TALDYQORǴAN. QazAqparat - Almaty-Óskemen tasjolynda 2 adam qaza taýyp, 4 adam aýrýhanaǵa tústi. Onyń úsheýi - balalar, dep habarlaıdy QazAqparat tilshisi.
Oqıǵa 24 sáýirde Kóksý aýdanynda boldy. Almaty-Óskemen avtojolynyń 190-shaqyrymynda
«Subaru Legacy» kóliginiń júrgizýshisi rýlge ıe bola almaı qalyp, mashınanyń aýdarylýyna jol berdi.
Jol apatynda áıel men búldirshin mert boldy. Ártúrli jaraqattarmen taǵy 4 adam jaqyn mańdaǵy aýrýhanaǵa jetkizildi. Olardyń arasynda kámeletke tolmaǵan úsh bala bar.
Oqıǵa ornynda polıtseıler mán-jaıdy anyqtap jatyr.
«Jetisý oblysynyń polıtsııasy jol qozǵalysyna qatysýshylardy Qazaqstan Respýblıkasynyń jol qozǵalysy erejelerin qatań saqtaýǵa shaqyrady. Jol - qatelikti keshirmeıdi. Júrgizýshiniń shamaly qateligi qaıǵyly saldarǵa ákelýi múmkin. Esińizde bolsyn, sizderdiń árqaısyńyzdy jaqyndaryńyz úıde kútedi»,- delingen Jetisý oblystyq polıtsııa departamenti baspasóz qyzmetiniń habarlamasynda.
