«Almaty - Óskemen» tas jolynda qalǵan 50 adam áskerı tehnıkamen evakýatsııalandy

ASTANA. QazAqparat - Qarýly kúshterdiń «Shyǵys» óńirlik qolbasshylyǵynyń áskerı qyzmetshileri joldardy tazartýǵa jáne aýa raıynyń qolaısyzdyǵynan jolda turyp qalǵan júrgizýshiler men jolaýshylarǵa kómek kórsetýge tartyldy, dep habarlaıdy QazAqparat.

Jeldiń kúrt kúsheıýi men qatty borannyń saldary shyǵys aımaqtaǵy respýblıkalyq jáne jergilikti mańyzy bar joldarda qıyn jaǵdaı týǵyzdy.

Tótenshe jaǵdaılar mınıstrliginiń aýmaqtyq qutqarý bólimshesine Aıagóz garnızonyndaǵy tankıster quramasy men ınjenerlik-saperlik batalonnyń áskerı qyzmetshileri kómekke keldi.

«Almaty - Óskemen» tas jolynyń 40 shaqyrymynda brondy tank qyzmetiniń bastyǵy maıor Erjan Byjkeevtiń basshylyǵymen áskerı qyzmetshiler qar qursaýynda qalǵan 50 adam men 10 shaqty avtokólikti arnaıy tehnıkamen evakýatsııalady. Olardyń barlyǵy Aıagóz qalasyna jetkizildi.

Qutqarý jumystaryna qazirgi ýaqytta bes áskerı tehnıka jumyldyrylǵan.

Foto: Qazaqstan Respýblıkasy Qorǵanys mınıstrliginiń baspasóz qyzmeti