Almaty-Óskemen-Lepsi-Aqtoǵaı avtojolyn jańartýdy aıaqtaý úshin 7,4 mlrd teńge qajet
«Memleket basshysy byltyrǵy oblysymyzǵa jumys sapary barysynda kelesi eki jyl ishinde «Lepsi – Balqash» avtojolynyń qurylysyn aıaqtaý jóninde tapsyrma berdi. Avtojoldyń jalpy uzyndyǵy – 141 shaqyrym, búginge onyń 39 shaqyrymy jóndeldi. Іske asyrý satysynda eki joba bar: «Lepsi – Balqash kóli» 0-27 shaqyrymy jáne «Almaty-Óskemen-Lepsi-Aqtoǵaı» jolynyń 35-110 shaqyrymy. Eki jobanyń jalpy quny – 17,7 mlrd teńge, 9,5 mlrd teńge bólindi, onyń ishinde 2023 jylǵa – 2,9 mlrd teńge. «Almaty-Óskemen-Lepsi-Aqtoǵaı» avtojolynyń 35-110 shaqyrymyn qaıta jańartýdy aıaqtaý úshin 7,4 mlrd teńge qajet. Indýstrııa jáne ınfraqurylymdyq damý mınıstrligi 2023 jylǵa ótinim berilgen somanyń 2,5 mlrd teńgesin qoldady jáne qarjy kúzde respýblıkalyq bıýdjetti túzetý kezinde bólinbekshi. Sizderden 2023 jylǵy respýblıkalyq bıýdjetti naqtylaý kezinde jáne 2024-2026 jyldarǵa arnalǵan respýblıkalyq bıýdjetti qaraý kezinde qurylysty aıaqtaý úshin qarajat bólýge járdem kórsetýdi suraımyz», - dedi Beıbit Isabaev.
Beıbit Óksikbaıuly depýtattardyń nazaryn joba qunynyń qymbattaýyna aýdardy.
«Jańa Bıýdjet kodeksiniń jobasyn qaraý kezinde qurylystyń normatıvtik merzimderin saqtamaýǵa, ulttyq valıýta baǵamynyń eleýli ózgerýine jáne qurylys materıaldary qunynyń qymbattaýyna baılanysty jobanyń smetalyq quny ulǵaıǵan jaǵdaıda respýblıkalyq bıýdjetten qarjylandyrý normasyn qosý oryndy dep sanaımyz. Mysaly, «Almaty – Óskemen – Lepsi – Aqtoǵaı» avtojolyn qaıta jańartý» jobasyn iske asyrý 2018 jyly bastaldy, ıaǵnı altynshy jyl qatarynan iske asyrylyp keledi. Qurylystyń normatıvtik merzimi – 2,5 jyl. Osy ýaqyt ishinde qurylys materıaldarynyń quny 2 ese ósti», - dedi ol.
Aıta ketsek, aımaqta aýyldyq eldi mekenderde káriz jelisin salý jumysy da ózekti bolyp tur. Sondaı-aq, densaýlyq saqtaý salasyndaǵy iri jobalardy iske asyrý, Alakól kóliniń jaǵasyn bekitý, Aqshı jáne Kóktuma aýyldaryna deıin joǵary voltty elektr berý jelileriniń qurylysy búgingi kúnniń basty talabyna aınaldy. Bul máseleler oń sheshimin tabatyn bolsa, oblystaǵy týrızm salasynyń órkendeýine jol ashady.
Jalpy, kezdesýge qatysýshylar oblystyń damýyna qatysty kóptegen usynystaryn jetkizdi. Sonyń ishinde aýyl sharýashylyǵy salasyndaǵy memlekettik satyp alý, azyq-túlik qaýipsizdigin qamtamasyz etý, sýbsıdııalaý qaǵıdalary, ınvestıtsııalyq jobalardy jetildirý, jaıylymdardyń jetispeýshiligin joıý, halyqtyń talap-tilegine qulaq asý syndy bastamalar aıtyldy.
Parlamenti Senaty men Májilisiniń depýtattary Jetisý oblysynda birneshe kún jumys saparymen bolady. Eskeldi, Qaratal, Aqsý, Sarqan, Alakól aýdandary men Taldyqorǵan, Tekeli qalalarynda jergilikti máslıhat depýtattarymen birlesip, óndiris oryndaryn, áleýmettik nysandardy aralaıdy jáne kóterilgen ózekti máselelerdi talqylaıdy.
Fotograf: Jeńis Ysqabaı
