Almaty-Óskemen avtojolynda jol-kólik oqıǵasynan 3 adam qaza boldy
ASTANA. 9 jeltoqan. QazAqparat /Rýslan Ǵabbasov/ - Keshe Almaty-Óskemen avtojolynyń ońtústik baǵytyndaǵy 156-shaqyrymynda «Toıota» júrgizýshisi kóliktiń róline ıe bola almaı qalýy sebebinen joldyń qarsy jolaǵyna shyǵyp ketip, «Aýdı» avtokóligimen soqtyǵysty. Jol-kólik oqıǵasynyń saldarynan 3 adam qaza boldy jáne 5 adam túrli dene jaraqattaryn aldy,
dep habarlaıdy «Qazaqavtojol» RMK-nyń baspasóz qyzmeti.
Respýblıkalyq memlekettik kásiporynnyń málimetine qaraǵanda, atalǵan jol ýchaskesinde joldyń tegis emestigin kórsetetin jáne kólikti basyp ozýǵa tyıym salýdy eskertetin jol belgileri ornatylǵan. «Alaıda, avtokólikterge arnalǵan osyndaı belgilerge qaramastan, respýblıkalyq mańyzy bar joldarda júrgizýshilerdiń jol erejesin saqtamaýy saldarynan jol-kólik oqıǵalary jıi bolyp turady. Osy oraıda, respýblıkalyq mekeme kólik júrgizýshilerine jol júrý erejelerin saqtap, ornatylǵan belgilerge nazar aýdaryp otyrýdy eskertedi»,-delingen baspasóz qyzmetiniń málimetinde.
Aıta keteıik, «Qazaqavtojol» RMK elimizdegi respýblıkalyq mańyzy bar joldardy jóndeýmen, kógaldandyrý jáne qys kezinde tazalaý jumystarymen aınalysady. Kásiporyn 23,5 myń shaqyrym avtojolǵa qyzmet kórsetedi. Onyń ishinde Qazaqstan úshin strategııalyq mańyzy bar 6 halyqaralyq dáliz bar. Osy joldardy qys kezinde qardan tazalaý úshin búginde 300-ge jýyq tehnıka jumyldyrylyp otyr.
