Almaty-Óskemen avtojolynda bes adam qaza tapty
ÚRJAR. QazAqparat - Búgin tańerteń Almaty-Óskemen jolynyń 678-shaqyrymynda iri jol apatynda bes adam qaza tapty, onyń ekeýi sábı, dep habarlaıdy QazAqparat tilshisi.
Úrjar aýdandyq ІІB Ákimshilik polıtsııa bóliminiń aǵa ınspektory Aıdar Samateevtyń sózine qaraǵanda, Úrjar aýdanyna qarasty Qaraqol aýyldyq okrýginen Aıagózge bet alǵan «Aýdı-80» avtokóligi Kókpekti aýdanynan Shymkentke mal tıep bara jatqan júk kóligimen betpe-bet soqtyǵysqan. Bastapqy boljam boıynsha júk kóliginiń júrgizýshisi rýlde uıyqtap ketken.
Jol apatynan bes adam jedel járdem jetkenshe, oqıǵa ornynda qaza tapty. Aldyn ala málimet boıynsha, onyń ekeýi - sábı. Bireýi - 2013 jylǵy, ekinshisi qyrqynan jańa shyqqan náreste. Eki adam jaqyn mańdaǵy Taskesken aýrýhanasyna jetkizildi. Medıtsına qyzmetkerleriniń aıtýynsha, ekeýiniń jaǵdaıy óte aýyr. Jeńil kóliktegiler - Úrjar aýdanyna qarasty Qaraqol aýylynyń turǵyndary.
Úrjar ortalyq aýrýhana dırektorynyń orynbasary Beıbit Ǵabdýllınniń aıtýynsha, aýdan ortalyǵynan Taskeskenge dárigerler toby attanǵan. Medıtsınalyq mamandar aman qalǵandardyń ómirin saqtap qalý úshin baryn salýda.
