Almaty ortalyǵyndaǵy mektepten oqýshylar shuǵyl evakýatsııalandy

ALMATY. QazAqparat – Almaty qalasynda №56 orta mektepke jarylǵysh zat qoıylǵany týraly habarlamadan keıin ǵımarattan oqýshylar men qyzmetkerler shuǵyl evakýatsııalandy, dep habarlaıdy QazAqparat tilshisi.

Almaty qalalyq Polıtsııa departamentiniń málimetinshe, búgin túski saǵat 12:00 shamasynda jedel basqarý ortalyǵyna bilim ordasyna jarylǵysh zat qoıylǵany týraly habarlama túsken.

«Qalanyń jedel jáne tótenshe jaǵdaılar qyzmetteri alǵashqy den qoıý sharalary aıasynda bilim mekemesinde tekserý júrgizdi. Oqýshylar men ustazdar evakýatsııalandy», - dep habarlady Almaty qalalyq Polıtsııa departamentiniń resmı ókili Saltanat Ázirbek.

Belgili bolǵanyndaı, mektep ǵımaratyn tekserý kezinde jarylys qurylǵylary tabylǵan joq. Bilim mekemesi shtattyq rejımde jumys istep tur.

«Qazir polıtsııa mektepke jarylǵysh zat qoıylǵany týraly jalǵan habar taratqan adamdy anyqtap jatyr. Ol qylmystyq jaýapqa tartylady»,- dedi Saltanat Ázirbek.