Almaty ortalyǵyndaǵy 15 úı bes jyldan beri sý máselesin sheshe almaı júr

ALMATY. QazAqparat – Almatyda Baıshev kóshesinde 15 otbasy 5 jyldan beri sý máselesine baılanysty shaǵymdanyp júr, dep habarlaıdy QazAqparat tilshisi.

Búgin turǵyndar BAQ ókilderin shaqyryp, túıtkildi jaıtty ortaǵa saldy.

Bul aýdanda sý qubyrlary túgel qaıta jańǵyrtý baǵdarlamasyna saı jańartylyp jatyr. Tek 130 metrge sozylǵan Baıshev kóshesiniń tuıyqtalǵan jerinde turatyn turǵyndar ǵana aýyz sýdan qaǵylyp otyr.

Tozyǵy jetken qubyrdyń salynǵanyna 50 jyl bolǵan. Keńes odaǵy kezinde aýyz sýmen qamtý úshin ujymdyq kelisimshart jasalǵan.

Turǵyndardyń aıtýynsha, qazir bir jerin jamap jatsa, ekinshi jeri shirip jatyr.

«Sýdyń qysymy joq. Jýyna almaımyz, kir jýa almaımyz. Qalanyń qaq ortasynda 130 metr kóshede sý joq, káriz júıesi joq, kóshe jaryǵyn ózimiz jabylyp jasadyq. Bizdiń qubyrlar kezinde ujymdyq kelisimmen turǵyndardyń menshiginde bolǵan. Biraq, qazir biz qubyrlardy óz kúshimizben jasaı almaımyz. Ol úshin ár otbasy 308 myń teńge tóleýi tıis. Jalpy alǵanda 4 mln teńgeden asady. Bizde múmkindigi shekteýli jandar, zeınetkerler kóp turady. Biz ol aqshany kótere almaımyz», - dedi Baıshev kóshesiniń turǵyny Elena Tsoı.

Turǵyndar qubyrdy úkimet óz qaraýyna alsa deıdi.

Halyqtyń bul shaǵymyna Jetisý aýdany ákimdiginiń ókilderi jaýap berdi.

«Ol kóshede keıbir qubyrlar «Almaty sý» balansyna jatpaıdy. Turǵyndardyń óz menshiginde. «Almaty sý» kásiporny qazir kóp kóshelerde rekonstrýktsııa jasap jatyr, eskirgen qubyrlardy aýystyryp. Olar óz balansynda joq qubyrlardy jóndeı almaıdy. Oǵan qarajat qarastyrylmaǵan. Bul turǵyndarǵa qurylys kompanııasynyń ókilderi kómek berýi múmkin. Sý jelilerin «Almaty sý» MKK balansyna berilýi úshin ol sý qubyrlary ıesiz dep tanylýy kerek. Al bul sot arqyly sheshiledi», - dedi qalalyq Energotıimdilik jáne ınfraqurylymdyq damý basqarmasynyń sý resýrstaryn basqarý jáne gazdandyrý shemasyn júzege asyrý bóliminiń bas mamany Nurlan Ómirhanov.