Almaty ortalyǵynda jataqhana órtenip, bir adam ajal qushty
ALMATY. QazAqparat – Almatynyń Almaly aýdanynda 4 qabatty jataqhanadan órt shyqty, dep habarlaıdy QazAqparat qalalyq Tótenshe jaǵdaılar departamentine silteme jasap.
«Búgin saǵat 17.45-te «101» pýltine Almaty aýdany, Áýezov kóshesi, 62 «a» mekenjaıynda órt bolyp jatqany týraly habarlama tústi. Saǵat 17.55-te jetken qutqarýshylar 4 qabatty jataqhananyń úshinshi qabatyndaǵy bólme ashyq jalynmen órtenip jatqanyn anyqtaǵan», - dep málim etti TJD-dan.
Qoıý tútin saldarynan turǵyndar dalaǵa júgirip shyǵyp, órt sóndirýshilerge habarlasqan. Sondaı-aq órt shyqqan bólmede adam bolýy múmkindigin aıtqan.
«Adamdardy izdeý jáne tilsiz jaýdy aýyzdyqtaý úshin gaztútinnen qorǵaý qyzmetiniń 2 brıgadasy jumyldyryldy. Osy maqsatta úshinshi qabattaǵy terezege deıin úshıindi saty ornatylyp, jalyndy óshirýge órt sóndirý oqpany berildi. Onymen bir mezgilde evakýatsııa joldaryn qorǵaý úshin ekinshi oqpan paıdalanyldy», - dep qosty baspasóz qyzmetinen.
Bólmeden bir adamnyń máıiti tabyldy, jynysy jáne tulǵasy anyqtalý ústinde.
Qolǵa alynǵan sharalardyń arqasynda órttiń jataqhananyń qabyrǵalas ornalasqan bólmelerine jáne ózge qabattarǵa taralýyna jol berilgen joq. Jalyn 17.59-da oqshaýlanyp, taǵy 10 mınýttan keıin tolyǵymen óshirildi. Zalal kelgen aýmaq - 20 sharshy metr.
