Almaty onkologııalyq ortalyǵynda ashyq esik kúni ótedi
ALMATY. QazAqparat - Ashyq esik kúni Almaty onkologııalyq ortalyǵynda 13 aqpan kúni saǵat 9.00-den 13.00-ge deıin ótedi, dep habarlaıdy QazAqparat tilshisi.
Almaty onkologııalyq ortalyǵynda qaterli isikti erte anyqtaýǵa arnalǵan ashyq esik kúni ótedi. Bul kúni bastapqy tekserýden ótip, ortalyqtyń jetekshi mamandary: mammolog, gınekolog, hırýrg, onkodermatolog jáne ýrologtan konsýltatsııa alýǵa bolady.
Sondaı-aq kórsetkishteri boıynsha sút bezine, ish qýysy organdaryna jáne kishi jambasqa ýltradybystyq zertteýler júrgiziletin bolady.
«Tájirıbe kórsetkendeı, onkologııalyq aýrýlardy erte satysynda anyqtaǵan kezde 95%-ǵa jýyq emdeýdiń joǵary nátıjelerine qol jetkizýge bolady. Qaterli isikti erte dıagnostıkalaý tezirek saýyǵyp ketýdiń kepili «, – dep atap ótti Almaty onkologııalyq ortalyǵy bas dárigeriniń orynbasary Álııa Tóresheva.
Ashyq esik kúni Almaty qalasy, Papanın kóshesi 220, A lıteri, 1 qabat mekenjaıynda ótedi.
Qosymsha aqparatty 8 (727) 312 2474 telefony arqyly bilýge bolady.
