Almaty óńirlik garnızonynyń áskerı qyzmetshileri Qarǵaly kentinde 200-ge jýyq aýla men bir shaqyrym joldy sý tasqyny saldarynan tazartty (FOTO)
ASTANA. QazAqparat - Almaty garnızony áskerı qyzmetshileriniń kúshimen turǵyn úılerdiń 200-ge jýyq aýlasy, 1000-nan astam metr jol sel tasqyny saldarynan tazartyldy.
«Keshe sel saldarynan tastardyń astynda qalǵan Almaty kóshesi tolyq tazartyldy. Endi tehnıka men adamdar kóshede emin-erkin júre alady, jol túgeldeı ashyldy», - dedi QR QK QÁ Aeroutqyr áskerleri qolbasshysynyń qarý-jaraq jónindegi orynbasary , polkovnık Erkin Alashbekov.
Qazirgi ýaqytta Qarǵaly kentinde Almaty óńirlik garnızonynyń 400-den astam áskerı qyzmetshisi júr. Olardyń jartysy jergilikti mekteptiń jertólesinen sýdy aǵyzý jáne ǵımaratqa irgeles ornalasqan aýmaqty tazartý boıynsha eńbektenýde, qalǵandary áli kúnge deıin sý basyp qalǵan aýlalar men joldardy tazartýdy jalǵastyrýda, dep habarlady QR Qorǵanys mınıstrliginiń baspasóz qyzmeti.
«Laı kóshkini úıimizdiń aýlasyn basyp ketti, biz shyǵyp ta úlgermedik. Qazirgi kezde tastar men balshyqtyń úıindisinen esh nárse qalǵan joq. Orasan jumys atqaryldy, óte kóp kúsh jumsaldy. Bizge qol ushyn sozýǵa kelgen adamdarǵa sheksiz alǵysymyzdy bildiremiz», - deıdi kent turǵyny Dınara Ysqaqova.
Eske sala keteıik, Qarǵaly ózeninde sý deńgeıiniń joǵarylaýyna baılanysty Qarǵaly jáne Taýsamaly shaǵyn aýdandarynyń ishinara sý basýy oryn alǵan bolatyn. Onyń saldarynan Almaty qalasynyń Áýezov, Naýryzbaı jáne Alataý aýdandaryndaǵy turǵyn úıler zardap shekti. Búgingi tańda Almatyda tótenshe jaǵdaı rejimi saqtalýda. Osyǵan baılanysty, Qazaqstan Qarýly Kúshteriniń áskerı qyzmetshileri tótenshe jaǵdaı aýdanynda jumys atqarýdy jalǵastyrýda.
Áskerı qyzmetshilerdiń jumysyn úılestirý, mindetterdi jáne jumys ýchaskelerin bólý maqsatynda jedel shtab qurylǵanyn atap ótken jón. Ol aǵymdaǵy apta boıy qyzmet atqaratyn bolady.
