Almaty óńirinde Shveıtsarııa azamattary qutqaryldy
ASTANA. QazAqparat - Almaty oblysy aýmaǵynda Shveıtsarııa azamattary qutqaryldy. Bul jaıynda atalǵan oblystyń tótenshe jaǵdaılar departamentinen málim etti, dep habarlaıdy QazAqparat.
«2017 jyldyń 30 mamyrynda Almaty oblystyq TJD jedel kezekshiligine sheteldik azamattan, Shveıtsarııanyń Tsıýrıh qalasy turǵynan kómek suraǵan ótinish tústi. Shveıtsarııa azamattary, anasy men balasy Balqash kóliniń soltústik jaǵalaýyna týrıstik saparmen barý úshin Almatydan kólikpen shyqqandyǵy anyqtaldy. Balqash qalasynan ótkennen keıin Aqtoǵaı eldi mekenine jetpesten GPS júıesiniń isten shyǵýy saldarynan olar joldan adasyp, batpaqqa batyp qalǵan», - dedi baspasóz qyzmetinen.
Qutqarýshylardyń aıtýynsha, uly kómek alyp kelý úshin anasyn mashınada qaldyryp ketken. 20 shaqyrym júrgennen keıin ol Qaratas razezdi aýmaǵynda temirjolshylarmen kezdesip, Aqtoǵaı eldi mekenine jetken. Saıahatshy kórsetken koordınattarǵa sáıkes kóliktiń Almaty oblysy aýmaǵynda qalǵany anyqtalǵan.
«Ol jaqqa qutqarýshylardy jiberý sheshimi qabyldandy. Almaty oblystyq TJD Sarqand qutqarýshylar bólimshesiniń 6 qutqarýshysy qaıyqpen Aıagóz ózenin júzip ótip, aıdalada turǵan kólikti tapty. Qutqarýshylar saıahatshylardyń kóligin batpaqtan shyǵaryp, Saıaq eldi mekenine deıin jetkizip saldy. Búgin olar Taldyqorǵan qalasyna aman-esen jetip, odan ary Almaty qalasyna qalaı jol júrip ketti», - dedi qutqarýshylar.
Shveıtsarııa azamattary Almaty oblystyq TJD qutqarýshylaryna jedel ári úılesimdi jumystary úshin rızashylyq bildirdi.
