Almaty óner salony ashyldy
ALMATY. Naýryzdyń 25-i. QazAqparat /Erlik Erjanuly/ - Keshe Almatyda «Artfoglio» dep atalatyn óner salonynyń tusaýkeseri ótti,
dep habarlaıdy QazAqparat.
«Italıan tilinen qazaqshaǵa aýdarǵanda «artfoglio» jańa paraq degen maǵynany bildiredi. Maqsatymyz - otandyq sýretshilerdiń alys-jaqyn shet elderdegi óz áriptesterimen ózara tájirıbe almasyp, oı-pikirlerin bólisýine jaǵdaı jasaý. Óıtkeni qazir elimizde óner galereıalary kóp bolǵanmen onda sýretshilerdiń bárine birdeı óz shyǵarmalaryn kórermen nazaryna usynýǵa múmkindik joq. Sondyqtan da biz óz isimizde óner áleminde jańa paraq ashýdan bastap otyrmyz», deıdi «Artfoglio» óner salonynyń dırektory Sharbat Ádilqyzy Barbaro. Ol ónersúıer qaýymǵa óz esigin sýretshilerdiń «Zelenyı bazar» shyǵarmashylyq dostastyǵy kórmesimen ashyp otyr. Ol sáýirdiń 24-ine deıin jumys jasamaq. Jalpy «Zelenyı bazar» sýretshiler shyǵarmashylyq dostastyǵynda beıneleý óneriniń ártúrli stılderi men baǵyttarynda jumys jasaıtyn Almaty qalasynyń 15 sheberi bas qosqan. Olardyń arasynda Asqar Esdáýletov, Anna Margatskaıa, Vsevolod Demıdov, Vladımır jáne Elena Grıgorıan, Ǵalııa jáne Balqııa Qusaıynova, Karmıne Barbara, Mıhaelı Rasım, Edýard Kazarıan jáne taǵy basqa sýretshiler bar. Sh. Barbaronyń aıtýynsha, óner salony endi óz múmkindigine qaraı shyǵarmashylyq keshter, kórmeler men vernısajdardy jıi ótkizýge kúsh salmaq. Sondaı-aq shetelden tek kásibı mamandardy ǵana shaqyryp qoımaı, bolashaqta qazaqstandyq sheberlerdi de ózge elderge aparyp, shyǵarmashylyq jumystaryn nasıhattaýǵa kóbirek kóńil bólýdi josparlap otyr.
