Almaty oqýshylarynyń 90 paıyzy qosymsha bilimmen qamtylady
ALMATY. QazAqparat - Almaty qalasynyń ákimi Baqytjan Saǵyntaev «Almaty» telearnasynyń tikeleı efırinde qosymsha jáne ortatehnıkalyq bilim berýge jasalatyn jaǵdaı týraly aıtty, dep habarlaıdy QazAqparat tilshisi.
Ákimniń aıtýynsha, balalarǵa mektepten tys tegin bilim berýdi arttyrý maqsatynda Naýryzbaı jáne Alataý aýdandarynda 2021-2023 jyldary eki jańa ınnovatsııa shyǵarmashylyǵy ortalyǵyn salý josparlanǵan. Bularda mektep jasyndaǵy 14 myńǵa jýyq bala oqıdy.
Sondaı-aq, bıyl Oqýshylar saraıy jańǵyrtylady. Bul mektep oqýshylaryna qosymsha bilim berý baǵdarlamasyn keńeıtedi. Mekemege kelgen balalar VR zerthanasy, aeromodeldeý, IT baǵdarlama, hi-tech-zerthanasy, robot tehnıkasy, jaratylystaný zerthanalary (hımııa, fızıka, bıologııa, gıdroponıka) jáne basqa da jańa baǵyt boıynsha bilimin jetildiredi.
«Oqýshylar saraıynda drondy damytý jáne 3D prototıpteý ortalyqtary qurylady. Sondaı-aq, modernızatsııalaý aıasynda observatorııa men planetarıı jumysy qalpyna keltiriledi. Eger búginde saraıǵa 5 myń bala kelse, modernızatsııadan soń bul sandy 2 esege, ıaǵnı 10 myń balaǵa deıin arttady», – dedi Baqytjan Saǵyntaev.
Memlekettik tapsyrysty mektepten tys jeke uıymdarda ornalastyrý arqyly taǵy 22 myń bala qosymsha bilim qamtylmaq. Osylaısha, qosymsha bilimmen qamtamasyz etilgen almatylyq balalardyń úlesi 88,5 paıyzǵa artady.
«Jastardy tehnıkalyq jáne kásiptik bilimmen qamtýdy maqsatynda, bıyl Alataý aýdanyndaǵy «Zerdeli» shaǵyn aýdanynda 300 oryndy jataqhanasy bar 720 oryndyq kolledjdiń qurylysy bastalady. Sondaı-aq, Almaty qalasynyń Indýstrıaldy aımaǵynda jataqhanasy bar jańa formattaǵy kolledj salý josparlanýda. Bul kolledjder jańa mamandyqtar boıynsha kadrlar daıarlaıdy. Sonymen qatar, qosymsha 300 jumys orny qurylady», – dedi ol.
