Almaty oqýshylary «Densaýlyq sabaǵy» kýrsynan ótedi

Búgin №87 mekteptiń 1-synyp oqýshylary mektep aldynda jol erejelerimen tanysty.

Joǵarǵy synyp oqýshylary Salaýatty ómir saltyna baǵyttalǵan flesh-mob ótkizdi.
Aıta ketý kerek, mektep medıtsınasy ótken jyldan bastap QR Bilim jáne Ǵylym mınıstrliginen QR Densaýlyq saqtaý mınıstrligine aýysqan bolatyn. Atalǵan reformadan soń mektep janyndaǵy medıtsınalyq pýnktterdiń jumysyna biraz ózgeris engizildi.
Byltyrdan bastap Jetisý aýdanyndaǵy № 11 emhananyń 6 medbıkesi mektepterde jumys jasap jatyr.
«2017 jyldyń 1 qańtarynan bastap mekteptegi medıtsınalyq qyzmet kórsetý sapasy jaqsara bastady. Sebebi, jyl basynan beri tereńdetilgen skrınıngter, sapaly dıagnostıkalyq tekserýler júrgizilip jatyr. Medıtsınalyq qyzmet burynǵydan da jaqsara bastady. Bizdiń emhanaǵa 6 mektep tirkelgen. Barlyǵynda medbıkeler jumys jasaıdy. Barlyq medpýnktter qajetti quraldarmen jabdyqtalǵan», - dedi №11 emhana bas dárigeriniń emdeý isi boıynsha orynbasary Almash Ardabaeva.
Al mektep ishindegi medıtsınalyq kabınetter sanıtarlyq talaptarǵa saı qural-jabdyqtarmen, boı ólshegish, tarazy, sterıldi shkaf, alǵashqy medıtsınalyq kómek kórsetetin quraldarmen tolyqtaı jabdyqtaldy.

      

Osyndaı densaýlyq sabaqtaryn dárigerler bir aı boıy ótkizýge yntaly.
«Mektep oqýshylaryna sapaly medıtsınalyq qyzmet kórsetý» aılyǵy barysynda mamandar durys tamaqtaný, dene belsendiligi, ımmýnoprofılaktıka taqyryptarynda kezdesý ótkizedi.

Jetisý aýdandyq medıtsınalyq bólim ókilderi ata-analarmen áńgime júrgizbek.
Oqýshylardyń ózderi «Mektepke qaýipsiz jol» semınarlaryna qatysyp, jaraqat almaýdyń joldarymen tanysady.
Qyrkúıek aıynda «Salaýatty ómir saltyna qolda!» sporttyq estafetasy jalǵasady.
Sonymen qatar, mektep psıhologtarynyń jaýapkershiligi arta tústi.
«Qoǵamǵa fızıkalyq qabileti men psıhologııalyq densaýlyǵy úılesken adam kerek. Ol úshin jasóspirimderdiń psıhologııalyq densaýlyǵyn túzeý mańyzdy. Biz dıstsıplınarlyq komandaǵa balalardy qabyldap, nusqaý beremiz. Dóńgelek ústelder ótkizemiz. Mektep psıhologtarymen tyǵyz baılanystamyz», - dedi №11 emhananyń psıhology Aıgúl Chýrbanova.